Ish-Kryeministri Sali Berisha iu drejtua me një thirrje studentëve dhe studenteve që të lënë auditorët dhe të nisin protestat kundër Edi Ramës.
Kreu demokrat, në fjalimin që iu mban çdo pasdite mbështetësve të tij nga dritarja e banesës ku ndodhet në “arrest shtëpie” pas vendimit të GJKKO, tha se të rinjtë e të rejat duhet të dalin në rrugë për ti thënë ndal shpopullimit të vendit.
“Sot, më shumë se gjysma e atyre që mbarojnë gjimnazet janë përjashtuar nga mesatarja për të hyrë në universitete.
Ata nuk kanë alternativë tjetër përveçse të largohen nga Shqipëria.
Sot, shkollat, gjimnazet, kanë bërë jo përpara, por kanë pësuar rënien më të madhe se në çdo vend tjetër të botës në 8 vitet e kësaj të keqe që quhet Edi Rama.
A nuk përbën për ju të dashur mësues dhe mësuese, të dashur gjimnazistë dhe gjimnazistë, një kambanë alarmi, rënia në pikiatë e cilësisë së arsimit tonë në 8 vite?
Studente dhe studentë, koha u thërret sot më shumë se kurrë, të ngriheni, të lini auditoret, të mbushni rruget dhe sheshet sepse universitetet tuaja po nuk u ngritët ju sot, pas 10 vitesh nuk do kenë më studentë.
Sepse pedagogët tuaj do largohen një nga një dhe vendin e tyre do e zënë trafikantët, kriminelët, militantët dhe injorantët.
Kurrë ndonjëherë, një rend, një sistem, një regjim nuk ka shkatërruar vendin dhe të ardhmen siç e shkatërroi Edi Rama në këto vite”, tha Berisha.
Sipas tij edhe rezultatet e Censusit tregojnë se në Shqipëri janë 1.5 mln njerëz, dhe kjo sipas ish-Kryeministrit është arsyeja që nuk publikohen rezultatet.
“Si ka mundësi që 1.1 milion shqiptarë ikën nga Shqipëria? Si ka mundësi që zbritëm më të keqpaguarit në rajon? Si ka mundësi që shpenzohen 1 miliard dhe nuk ndërtohet asgjë?
Si ka mundësi që mbyllen portet shekullore për të ndërtuar parajsat e Edi Ramës dhe banditëve të tij? Si ka mundësi që mashtrohemi dhe mashtrohemi? Ëndrra evropiane është bërë horizont që nuk kapet.
Kujtoni pak për një moment, vetëm dy muaj më parë, kur ju tha shqiptarëve se në dhjetor do keni një lajm të madh.
Cili ishte lajmi? Lajmi ishte mbyllja, moshapja e negociatave për kapitujt, sepse Edi Rama shkelmon opozitën, shkelmon Kushtetutën. Sepse Edi Rama nuk njeh ligj, nuk njeh moral, nuk njeh Kushtetutë përveç ambicieve të pushtetit të tij”, tha Berisha.
Një mesazh ish-Kryeministri e pati edhe për Edi Ramën, ndërsa u shpreh “Edvin, kjo rruga nën ballkon është rruga e shpresës, kjo rruga nën ballkon është rruga e njerëzve të lirë, kjo rruga nën ballkon është rruga e njerëzve guximtarë, në të vërtetë, kjo është rruga e lirisë.
Por rruga e Surrelit është rruga drejt Pëllumb Gjokës, drejt McGonigalit, drejt Bajrëve, drejt Gjushit tënd.
Edvin, rruga e Surrelit është rruga e turpit, rruga e vjedhjeve, rruga e krimit, rruga pa të ardhme, rroga qorr, rruga pa fund”.
Discussion about this post