Rektori i Universitetit të Tiranë, i është përgjigjur ditën e sotme kërkesës së studentëve, të cilët kërkuan pak ditë më parë uljen e tarifave studimore.
Përmes një deklarate për mediat, Hoxha u shpreh se nuk do të ketë ulje tarifash as për nivelin Master, as për Bachelor, pasi sipas tij Universiteti ka shpenzimi dhe tarfia është e përballueshme. Ai shtoi se studentët duhet ta shohin universitetin si një të mirë të përbashkët, jo si një institucion që duhet të ulë tarifat.
“Kemi pasur pyetje nga studentët shqetësimin për tarifat. Ne i kemi analizuar shpenzimet tona dhe na referon që kemi një ulje me 1.5% afërsisht, gjë e cila është mjaft minimale. Kemi paguar rregullisht çdo tarifë për ujin, dritat dhe shërbimet në Universitete. Mos harroni që kjo tarifë është vetëm 200-300 mijë lekë të vjetra dhe një pjesë e studentëve ekselentë ka tarifë të përgjysmuar, po ashtu dhe kategoritë në nevojë. Studenti duhet ta shoh Universitetin si një të mirë të përbashkët, jo si një institucion që duhet të ulë tarifat. 70% të studentët ne e kemi nga rrethet dhe për këta ka pasur më pak shpenzime pasi kanë ndjekur mësimin online. Tarifat e masterit po ashtu janë rreth 600 mijë deri në 1 milion apo 1.2 milionë lekë, janë tarifa të përballueshme”, u shpreh Hoxha.
Pak ditë më parë, studentët iu drejtuan me një letër-kërkesë Ministres së Arsimit, Evis Kushit, për të ulur tarifat e studimit. Në kërkesën e drejtuar, studentët shprehen se tarifat duhen përgjysmuar sepse gjatë gjithë vitit nuk kanë qenë prezentë në auditore dhe janë detyruar të paguajnë për të siguruar aksesin në interent. Sipas tyre, mësimi online ka qenë diskriminues dhe i paplotë.
