Berisha i drejtohet GJKKO-së, kërkon të marrë pjesë në Kuvend

Avokatët e Sali Berishës kanë ankimuar në GJKKO vendimin e SPAK, që i refuzoi kërkesën ish-kryeministrit që të marrë pjesë në seancat e Kuvendit.

Ish-kryeministri Sali Berisha ka kërkuar që të marrë pjesë në seancat e Kuvendit, megjithëse ndodhet në “arrest shtëpie”.

Në vendimin e tij, SPAK argumentonte se masa e sigurisë “Arrest në shtëpi”, e caktuar ndaj Berishës, nënkupton edhe pamundësimin e ushtrimit të profesionit në këtë rast.

Në vendim theksohej se kjo do të aplikohet në rastin e Berishës, njëlloj siç aplikohet edhe në rastet e qytetarëve të thjeshtë, të cilëve nën masën e sigurisë “Arrest shtëpie” u ndalohet shkuarja në punë.

Kujtojmë se Berisha akuzohet për korrupsion në dosjen e privatizimit të ish-kompleksit Partizani.

Masa “arrest shtëpie” ndaj tij u vendos pasi ai nuk respektoi masën e parë të vendosur ndaj tij, “detyrim paraqitje”.