Prokuroria e Posaçme po përgatitet seriozisht për ‘luftë’ kundër korrupsionit, pasi do të shpenzojë 2 miliardë lekë për dronët dhe disa pajisje vëzhgimi dhe përgjimi. Por me sa shohim, SPAK duhet të bëjë edhe një tender për vaksina antikorrupsion për stafin e vet.
Nga SPAK njerëzit presim ndëshkimin e zyrtarëve që abuzojnë me pushtetin dhe buxhetin, jo të tregojë babëzi me çdo fond që i bie në dorë. Në këtë drejtim, kreu i SPAK, Altin Dumani e paska situatën jashtë kontrollit.
Bëhet fjalë për tenderin me objekt “Blerje sisteme/pajisje të teknikës operative”, i cili është publikuar më datë 20 nëntor 2023. Për këtë prokurim SPAK ka planifikuar të shpenzojë 1 miliardë lekë (pa TVSH).
Ky është një projekt të cilin SPAK e ka ndarë në tre lote, sepse parashikon të blejë disa paisje të natyrave të ndryshme. Por, përplasja po bëhet për lotin tre me objekt “Blerje Sistem Anti – Dron autonom i palëvizshëm” me fond limit 24,066,667 lekë pa TVSH ose 230, 413 euro (pa TVSH). Pra 240 milionë lekë do të shpenzohen për anti dronë. Ç’i duan gjithë këto pajisje të sofistifikuara? Pse sillen sikur janë SPAK-u i Ukrainës dhe po luftojnë me rusët?
Përveç se nuk është argumentuar si është llogaritur fondi limit, në dokumentet e tenderit bien në sy denoncimi që është bërë për këtë lot.
Më datë 22 janar 2024, firma SINTEZA CO ka bërë një ankesë në KPP, ku kundërshton vendimin e SPAK mbi finalizimin e këtij tenderi. Se për çfarë ankohet firma në fjalë do ta raportojmë më vonë, sepse KPP për momentin ka menduar të mbajë “të fshehtë” dokumentin, ose do ta publikojë në një moment tjetër. Por, kjo shton edhe më shumë dyshimet që kemi të bëjmë me një manipulim në kriteret e tenderit.
KPP dhe SPAK favorizojnë ofertën e shtrenjtë
Nuk presim që KPP të korrigjojë vendimin e SPAK, por shyrtimi në këtë shkallë administrative na ndihmon të shohim ç’po ndodh me prokurimin. Për një lot tjetër të tenderit është bërë denoncim i ri. Konkretisht, më datën 17.10.2023 në Sistemin e Prokurimeve Elektronike është publikuar procedura e prokurimit “Procedurë e Hapur mbi Kufirin e Lartë Monetar” me nr. REF-83878-10-16-2023 3 me objekt: “Blerje pajisje dhe sisteme elektronike”, me fond limit 850 milionë lekë.
Denoncimi është bërë për ‘Loti i Pestë me nr. REF-83892-10-16-2023, me objekt: “Blerje server”, me fond limit 210 milionë lekë pa TVSH, zhvilluar me datë 16.11.2023 nga autoriteti kontraktor, Prokuroria e Posaçme Kundër Korrupsionit dhe Krimit të Organizuar.
Edhe me fakte nga tenderi, edhe në shpjegimin e tij ankimuesi “COMMUNICATION PROGRESS” SHPK tregon se si SPAK i ka dhënë pa garë tenderin kompanisë që paraqiti ofertën më të shtrenjtë.
Në dokumentin më poshtë shohim se kjo firmë ka paraqitur ofertën me vlerë 203 milionë lekë, pra sa 97% e fondit limit dhe më të lartë se firmat e tjera. Kështu SPAK ka kryer edhe një tjetër shkelje ligjore, duke cenuar konkurrencën dhe duke shfrytëzuar pa kriter fondet që paguhen nga taksat e qytetarëve.
Ankimuesi “Communciation Progress” shpk shprehet se i gjithë ky rezultat ka ardhur për shkak të kritereve diskriminuese dhe të hartuara nga SPAK që t’i përshtaten vetëm një operatori. Prandaj denoncuesi kërkon që të shfuqizohet vlerësimi i komisionit, i cili ka skualifikuar pa arsye ligjore ofertat më të lira dhe të rishikohen edhe njëherë të gjitha ofertat.
Theksojmë se vetë “Communciation Progress” shpk ka paraqitur një ofertë me vlerë 19% më të ulët se fituesi, që mund të përktheheshin në kursimin e 30 milionë lekëve.
Zoti Dumani, mbajeni dorën, janë paratë e popullit!
“Për sa më lart, kërkojmë shfuqizimin e vendimit të Komisionit të Vlerësimit të Ofertave për skualifikimin e ofertës së Operatorit Ekonomik Communciation Progress shpk, dhe kualifikimin e ofertës sonë si në përputhje me kërkesat ligjore dhe të DST, si një ofertë ekonomikisht më e favorshme peër Autoritetin Kontraktor, me një diferencë prej 2,990,780 lekë ose rreth 19% më ulët nga operatori i renditur në vendin e dytë, dhe si një ofertë teknikisht konform kërkesave dhe nevojave të AK”, thuhet në ankesë.
Por, KPP militante e drejtuar nga Jonaid Myzyri nuk ka menduar as për ato 30 milionë lekë, as për procedurën që shkel ligjin e prokurimeve. Prandaj pas shqyrtimit të ankesës, KPP ka vendosur të mos e pranojë atë, duke lejuar Dumanin që të vazhdojë procedurat me këtë tender abuzues.
Lexo edhe:Alket Qendro hedh 2.2 MLD lekë për lyerjen e Portit, tenderi denoncohet në KPP
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post