Jamarbër Malltezi, dhëndri i ish-kryeministrit Sali Berisha, u paraqit sot në SPAK në një seancë pyetjesh me cilësinë e personit nën hetim, lidhur me atë që njihet si dosja e privatizimit të kompleksit Partizani.
Malltezi ka qëndruar për të paktën 4 orë në SPAK, ndërsa për mediat tha se Prokurorja e çështjes pati qëndrime të padenja ndaj tij.
“Nuk ka vepër penale, por urdhri politik është urdhër politik. Natyrisht pati qëndrime krejtësisht të padenja për prokuroren e cila pa kuptuar situatën pronësore ka arrestuar një njeri pa prova. U pyeta nën cilësinë e një personi në hetim”, u shpreh ai për gazetarët.
Në vijim ai pohoi se nga SPAK nuk është pranuar ekspertiza kontabël, ndërsa akuzoi prokurorët se janë në konflikt interesi.
“Jam pyetur në cilësinë e personit në hetim. Prokurorët janë në konflikt interesi. Kam mbi 3 vite hetime dhe nuk ka asnjë fakt. Ka pasur urdhra politikë nga Rama për SPAK-un.
Kanë shkelur të drejtat kushtetuese. Taulant Balla ka bërë kallëzim të rremë”, u shpreh Malltezi.
Ai shtoi se pas 3 vitesh e dy muajsh me kënaqësi shkova të jap disa shpjegime.
“Sqarova ato që kisha për të sqaruar, por nuk kishin ndonjë gjë që nuk kuptonin. Ky është një proces politik i nisur nga Taulant Balla mbi bazën e disa gënjeshtrave që ka thënë rresht përfshirë pronësinë e pronës. Kemi presione që Rama i ka bërë SPAK-ut në mënyrë të vazhdueshme. Ka patur dy herë presione publike”, tha Malltezi.
Ai gjithashtu akuzoi edhe SPAK se po deligjitimon të gjithë reformën në drejtësi.
“SPAK po deligjitimon të gjithë reformën në drejtësi. Ka refuzuar të pranojë si ditë me këto dokumente të kallëzimeve, SPAK ka refuzuar ekspertizën kontabël që i vë në pozitë jo të mirë. Qartazi është i montuar. Gjithë procesi nuk ka dëm për financat publike, por ama financat e ka mësuar nga Rama me 130 milionë euro dëm dhe Rama fshihet”, shtoi ai.
Malltezi deklaroi gjithashtu se ka depozituar në prokurori të gjitha denoncimet e PD-së për tjetërsimet e zonave sportive në Tiranë, por që SPAK nuk i bëri pjesë të dosjes.
“I dhashë edhe këto të tjera por nuk guxuan t’i merrnin ka të bëjë denoncimet që ka bërë PD për tjetërsimet e të gjithë zonave sportive në të gjithë Tiranën nga Edi Rama, duke përfshirë dhe të fundit që është dhënë në kundërshtim me planin rregullues kulla 42 katëshe.
Është interesante i dhashë nga këto dokumentet që nuk kanë preferuar t’i bëjnë pjesë të dosjes duke përfshirë dhe dokumentin me firmë të Ramës. Të gjitha këto i depozituam”, shtoi ai.
Discussion about this post