Të dielën në komunën e Podujevës do të mbahet marshim për 18-vjeçarin, Lulzim Fejzullahu, i cili u rrah për vdekje nga dy të mitur më 14 janar.
Marshimi pritet të fillojë nga ora 13:00, ku pjesëmarrësit do të nisen nga vendi ku është sulmuar 18-vjeçari, për të vazhduar deri te komuna e Podujevës.
Prokuroria ka vendosur masën paraburgim për dy të miturit e dyshuar që morën pjesë në përleshjen fizike, pas së cilës Lulzimi mbeti i plagosur dhe më pas u dërgua për trajtim mjekësor në QKUK ku ndërroi jetë nga plagët e marra më 20 janar.
Rasti është cilësuar nga policia si vrasje e rëndë dhe është dënuar edhe nga kryeministri Albin Kurti.
“Vrasja mizore e Lulzim Fejzullahut duhet të jetë alarm për të gjithë, përfshirë institucionet, për të punuar më shumë me të rinjtë dhe të rejat, që të orientohen sa më shumë drejtë arsimimit dhe edukimit, në mënyrë që të mos e shohin dhunën si zgjidhje dhe që të qëndrojnë sa më larg sjelljeve agresive dhe akteve të dhunës që mund të përfundojnë me pasoja tragjike”, tha Kurti gjatë vizitës për ngushëllime te familja e të ndjerit.
Discussion about this post