Organizonin lojëra fati në lokal, në pranga tetë persona në Shkodër

Tetë persona kanë rënë në prangat e policisë së Shkodrës pasi akuzohen se ushtronin aktivitetin e paligjshëm të lojërave të fatit.

Policia bën me dije se në kuadër të operacionit të koduar Fati i lojërave”, është bërë i mundur arrestimi i Ndue Ukaj, 30 vjeç, për veprat penale “Organizimi ose ushtrimi i veprimtarive të lojërave të fatit”, “ Vënia në dispozicion e lokaleve për lojëra të palejuara”, “Fshehja e të ardhurave”, dhe “Ushtrimi i një aktiviteti tregtar të paligjshëm”.

Kjo, pasi gjatë kontrollit në një bar-kafe të paregjistruar në organet tatimore që e përdorte Ukaj në Velipojë, shërbimet e Policisë gjetën dhe sekuestruan në cilësinë e provës materiale, një shumë parash,  një tavolinë pokeri, çipsa dhe letra për lojën e pokerit që ky preson e organizonte në  lokalin e tij.

Marsel Ramaj, Flavio Gropaj, Anton Staka, Mateo Brenga, Nard Ahi, Tom Bzhetaj dhe Elton Lekda u arrestuan për  veprën penale “Organizimi ose ushtrimi i veprimtarive të lojërave të fatit”. Arrestimi i këtyre personave u bë pasi janë  konstatuar duke ushtruar aktivitetin e paligjshëm të lojërave të fatit.

Në kuadër të operacionit është sekuestruar një tavolinë pokeri, çipsa, letra që shërbenin për lojërat e fatit dhe një shumë parash.