Kreu i këshillit Kombëtar të PD, e ka konsideruar si qesharak veprimin e Lulzim Bashës për mbledhjen e Këshillit dhe shkarkimin e tij dhe të anëtareve që morën pjesë në Kuvendin e thirrur nga ish-kryeministri Berisha.
“Akti i mbrëmshëm po dhe ky i sotmi është thjeshtë në vazhdën e akteve të fundit, që me keqardhje të plotë e shpreh, po e bëjnë gjithnjë e më qesharake situatën në atë seli. Basha është shkarkuar dje nga Kuvendi, po edhe ne, të cilëve ai ka shpallur se do të na shkarkojë sot, jemi nga dje pjesë e Komisionit të Rithemelimit të PD. Ata, sekretarët, që kërkon kryetari i shkarkuar, të shkarkojë sot, kanë votuar dje bashkë me delegatet e tjerë, për shkrirjen provizore edhe të funksioneve të tyre… Pra miqtë e mi, mos u ndjeni aspak në siklet për pozitën time”, shkruan Paloka.
Ndër të tjera, ai shkruan në Facebook se ndihet keq nga e gjithë situata e krijuar në selinë blu, ndërsa shton se priste që Basha të tregohej më dinjitoz në veprimet e tij.
“E shpreh me sinqeritetin më të madh, se në gjithë këtë situatë, keqardhjen dhe dhimbjen më të madhe e kam pikërisht për Lulzim Bashën. Sinqerisht e përsëris, për hir të viteve që kemi kaluar ai si kryetar e unë si nënkryetar, ndjej keqardhje kur shoh se si arriti në këtë pikë. Mendoja se të paktën do dinte të tregohej pak më dinjitoz dhe i mençur”, shprehet ai.
Paloka ka reaguar lidhur me një mbledhje të Këshillit Kombëtar të PD, të thirrur nga Lulzim Basha, ku pritet të shkarkohen ai vetë, 11 drejtues dege, si dhe sekretarët që morën pjesë në Kuvendin e PD, i cili nuk njihet nga kryedemokrati.
Discussion about this post