VIDEO/ Me kapuç në kokë, ja momenti kur hajduti vjedh pistoletën e gardistit

Një punonjësi të Gardës së Republikës i kanë vjedhur në banesë armën e shërbimit, lloji pistoletë, si dhe disa sende të tjera.

Ka qenë vetë gardisti, Dhimitër Prifti, 36 vjeç, që ka denoncuar në Komisariatin nr.1 të Policisë së Tiranës, vjedhjen e banesës. Gardisti ka dorëzuar në polici edhe dy video, që tregojnë momentin kur hajduti realizon vjedhjen. I dyshuari është i veshur me tuta ngjyrë gri dhe një kapuç mbi kokë.

Ai afrohet në dritaren e banesës së gardistit, qëndron për pak çaste duke këqyrur nëse ka apo jo njeri brenda saj.

Në një moment ai drejtohet me fytyrë nga kamera e sigurisë dhe më pas vepron duke hyrë brenda. Nga pamjet rezulton se personit që dyshohet se ka kryer vjedhjen i kanë mjaftuar pak sekonda për të kryer grabitjen dhe ai del sërish nga dritarja. Në momentin e largimit, grabitësi e shmang kamerën duke mbuluar me duar fytyrën.

Policia ka nisur hetimet, ndërsa mes pistave që po hetohen është edhe ajo që autori të jetë një person i njohur me punonjësin e gardës. Dyshime lindin për shkak se qeni që i afrohet grabitësit para se të hyjë në banesë, nuk i leh. Gjithashtu autori i dyshuar duket se ka dijeni për mënyrën se si do të hyjë në banesë duke përdorur dritaren si dhe ka dijeni për vendin ku ndodhet arma.