Tjetër ngjarje e rëndë, dy vëllezër dhunojnë njëri-tjetrin për pronat

Një tjetër rast konflikti mes vëllezërve është shënuar ditën e sotme në fshatin Midhë të Matit.

Sipas raportimeve paraprake të policisë, një 61 vjeçar ka goditur me sende të forta vëllanë e tij, duke i shkaktuar dëmtime ne fytyrë.

Edhe në këtë rast, arsye e konfliktit ka qenë për motive pronësie.

Njoftimi i policisë

Mat/U konfliktua dhe goditi me sende të forta vëllanë e tij, ndërhyrja në kohë e Policisë parandalon përshkallëzimin e mëtejshëm të konfliktit.

Policia, kapi dhe vuri në pranga 61-vjeçarin.

Shërbimet e Komisariatit të Policisë Mat, pas marrjes së njoftimit se në fshatin Midhë, për motive pronësie po konfliktoheshin dy vëllezër, kanë shkuar menjëherë në adresën e marrë duke parandaluar përshkallëzimin e mëtejshëm të konfliktit.

Si rezultat, shërbimet e Policisë kapën dhe arrestuan në flagrancë shtetasin S.S., 61 vjeç, banues në fshatin Midhë, Mat.

Ky shtetas, për motive të pronësie, ishte konfliktuar dhe kishte goditur me sende të forta vëllanë e tij, duke i shkaktuar dëmtime në fytyrë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.