Serbët kundër projektit të dhëndrit të Trump, Shqipëria në gjumë

Dy javë më parë, mediat amerikane raportuan interesin e dhëndrit të Donald Trump Jared Kushner, për projekte në Beograd dhe bregdetin shqiptar. E teksa në Beograd kanë nisur lëvizje të organizuara kundër planeve të dhëndrit të ish-presidentit amerikan, në Shqipëri nuk duket të ketë kundërshti të zëshme.

Beogradi kundër

“Washington Post” raporton se një grup opozitar në Serbi nisi këtë të hënë një peticion kundër projektit që do të financohen nga firma e dhëndrit të ish-presidentit Donald Trump, Jared Kushner, në qendër të Beogradit, në ish-selinë e ushtrisë serbe të shkatërruar nga bombardimet e NATO-s në 1999. Pak ditë më parë, Kushner konfirmoi raportet se kompania e tij ka në plan të financojë projektin në qendër të Beogradit. Aty parashikohet të ndërtohet një hotel i lartë, një kompleks apartamentesh luksoze, hapësira për zyra dhe dyqane.

Peticioni i kërkon qeverisë së Serbisë të respektojë ligjin, i cili thotë se ndërtesa mund të kthehet vetëm në funksionin e saj origjinal. Ai gjithashtu kërkon që Muzeu i Historisë Serbe të krijohet atje.

“Ndërtimi i një hoteli në vendin e kësaj godine është i paligjshëm dhe përfaqëson shkatërrimin e dinjitetit tonë”, tha lëvizja opozitare Kreni-Promeni, duke bërë të ditur se 10,000 njerëz nënshkruan peticionin në më pak se 24 orë.

Zyrtarët e qeverisë pro-Trump në Serbi e kanë mirëpritur projektin, por opozita dhe publiku i gjerë janë shprehur kundër tij, raporton media amerikane. Për shumë njerëz, vendi i ndërtesës së komandës së ushtrisë të bombarduar, është një simbol i fuqishëm i rezistencës së Serbisë kundër asaj që ata e quanin agresion të NATO-s 25 vjet më parë.

Po në Shqipëri?

Në Shqipëri situata paraqitet larg asaj që po ndodh në kryeqytetin serb. Kryeministri Edi Rama ka pranuar se firma e dhëndrit të Trump ka shfaqur një interes për të investuar në Sazan dhe ka shtuar se oferta do të shqyrtohet nga autoritetet. Megjithatë propozimin e ka vlerësuar me superlativa.

E teksa në Serbi është një lëvizje opozitare që del kundër planeve të Kushner, opozita në Tiranë duket se ka rënë dakord në heshtje. Vetëm disa syresh kanë shprehur haptazi kundërshtitë kundër projektit, kryesisht faljes së Sazanit me ligj për dhëndrin e Trump.

Por, përveç qëndrimeve personale të pak deputetëve, zyrtarisht Partia Demokratike nuk ka shprehur asnjëherë një qëndrim qartazi kundër. Në një prononcim për gazetarët javën e kaluar, kur u pyet për çështjen, Gazment Bardhi tha se “në parim, mbështesim çdo investim të huaj, por rikonforojmë qëndrimin tonë, që investimet e huaja duhet të miratohen në transparencë të plotë, në përputhje me ligjin, me garë të hapur dhe një analizë se çfarë përfitojmë”.

Ky mbetet i vetmi reagim nga një zyrtar i lartë i selisë blu, ndërsa kryetari, Sali Berisha nuk e ka prekur çështjen në ligjërimet e tij nga dritarja e banesës gjatë protestave ditore.

Si mazhoranca dhe opozita besohet se nuk e kundërshtojnë projektin për shkak të interesave politike që mund ti shfrytëzojnë për të mbajtur apo ardhur në pushtet.

Opozita e vërtetë ndaj projekteve që do të sjellin faljen e bregdetit dhe të ishullit më të madh të vendit, aktualisht Zonë e Mbrojtur, duket se po bëhet vetëm në mediat larg frymës së pushtetit.

Por, a mjafton kaq?