Trajneri i Kombëtares së Italisë, Roberto Mancini, i ka dërguar një mesazh Sergio Agueros pas lajmeve për tërheqjen nga futbolli i luajtur për shkak të problemeve në zemër.
Aguero do të dalë sot në një konferencë për mediat krah presidentit të Barcelonës, Joan Laporta, në ‘Camp Nou’ ku do të bëjë njoftimin publik për pensionimin para kohë.
Argjentinasi pati vështirësi në frymëmarrje dhe shtrëngim në gjoks në një ndeshje të Barçës kundër Alavesit më 30 tetor, ndërsa nga vizitat mjekësore doli që 33-vjeçari ka çrregullime në aritmi.
Rikujtojmë se sulmuesi u bashkua me katalanasit në verë si lojtar i lirë, ndërsa u largua nga Manchester City ku kaloi pjesën më të madhe të karrierës së tij.
Mancini, i cili ishte trajneri që i dha Manchester City-t titullin e parë në Premier League në sezonin 2011-2012, e kishte Agueron si sulmuesin kryesor të ekipit gjatë kohës së tij në Etihad.
“Më vjen shumë keq, i uroj të gjitha të mirat. Më vjen shumë keq të dëgjoj se ai po largohet kaq shpejt. Unë e desha atë në City, ai është lojtari i huaj me mesataren më të lartë të golave në Angli. Më vjen keq që ai duhet të largohet nga futbolli kaq shpejt”,- tha Mancini.
Rikujtojmë se tekniku italian e drejtoi Manchester City-n nga dhjetori 2009 deri në maj 2013 dhe Aguero i ishte bashkuar klubit më 2011./K.T/Gijotina.com
Discussion about this post