Një aksident me vdekje ka ndodhur mbrëmjen e sotme në aksin rrugor “Lushnjë-Fier”. Viktima është identifikuar nga policia si Hasan Selimi, banues në Savër, rreth 65 vjeç.
Sipas një rindërtimi paraprak të ngjarjes, ai ishte duke kaluar rrugën në këmbë me një karroc dore, kur është përplasur nga një automjet.
Përplasja rezultoi fatale për 65-vjeçarin i cili nuk arriti të mbijetojë.
Drejtuesi i automjetit është shoqëruar nga policia.
“Rreth orës 20:20, shtetasi A. F., 55 vjeç, duke drejtuar një automjet tip ‘Ford’, ka aksidentuar këmbësorin, shtetasin H.S., rreth 65 vjeç. Si pasojë e aksidentit, ka ndërruar jetë shtetasi H.S. Drejtuesi i automjetit, shtetasi A.F., është shoqëruar në Komisariat nga shërbimet e Policisë, për veprime të mëtejshme”, njoftoi policia.
Grupi hetimor po punon për sqarimin e plotë të rrethanave të aksidentit, shtuan të njëjtat burime.
Discussion about this post