Ish-kryeministri Sali Berisha ka vijuar me akuzat ndaj Edi dhe Olsi Ramës, në lidhje me laboratorin e kokainës në Xibrakë. Berisha i bëri akuzat pas publikimit të dokumenteve nga Gazment Bardhi, i cili akuzoi se Olsi Rama kishte udhëtuar të paktën 18 herë me një nga makinat e trafikut të kokainës, të hetuar me urdhër nga autoritetet ligjzbatuese gjermane.
Duke iu referuar reagimit të Olsi Ramës, Berisha u shpreh se, mbrëmë, për herë të parë, Edi Rama dhe i vëllai pranuan autorësinë e krimit të Xibrakës.
Berisha tha se ata “deklaruan me një fletërrufe se Olsi vërtet është shoqëruar me ndonjë prej tyre, vërtet ka udhëtuar me makinën e tyre, por nuk ka lidhje me ta, paçka se Olsi bënte mbledhje në apartamentet e fshehta të grupit”.
Nga protesta poshtë banesës së tij, kreu i opozitës tha nuk ka kund kryeministër në Europë që të jetë dokumentuar se vëllai i tij ka bërë 18 udhëtime me makinën kryesore të grupit të trafikantëve.
Duke u ndaluar te dosja “5 D” Berisha tha se, kryehajdutit të Bashkisë Erion Veliaj nuk i hyri ferrë në këmbë, sepse kryehajdutit të qeverisë Edi Rama nuk i ndodh asgjë.
Ai akuzoi se disa media censuruan denoncimin e opozitës për Olsi Ramën.
Discussion about this post