Të hënën, do të mblidhet Këshilli i Mandateve lidhur me mandatin e Olta Xhaçkës. Kjo u zbulua gjatë një mbledhjeje të konferencës së kryetarëve këtë të mërkurë, nga kryeparlamentarja Lindita Nikolla.
Kritika për moszbatimin e vendimit të Gjykatës Kushtetuese pati kreu i grupit parlamentar demokrat, Gazment Bardhi.
“Në shkelje të Kushtetutës ju si kryeparlamentare dhe si mazhorancë po refuzoni të zbatoni vendimin e Gjykatës Kushtetuese. Keni nxjerr justifikime absurde nga janari i vitit 2023 e deri më sot. Kjo praktike e Gjykatës Kushtetuese është praktike e njohur, por ju bëni sikur nuk e kuptoni dhe e zvarrisni. Doni ta ktheni edhe një here tek këshilli i mandateve ku vendimet e këtij e këtij këshilli kanë qenë subjekt i shqyrtimit ne Kushtetuese”, iu drejtua Bardhi-Nikollës.
Kërkesa për heqjen e mandatit të deputetes për Olta Xhaçkën u depozitua në Kushtetuese nga deputetë të opozitës, pas përfitimit të statusit të investitorit strategjik, të bashkëshortit të ish-ministres.
Ky fakt, sipas opozitës, përbënte konflikt interesi e për këtë arsye kërkoi ndërprerjen e mandatit të deputetit, për Xhaçkën. Shumica socialiste nuk e pranoi kërkesën e depozituar në Kuvend. Çështja përfundoi në Gjykatën Kushtetuese, e cila e konsideroi të gabuar vendimin e parlamentit marrë nga shumica socialiste, duke urdhëruar që rasti të paraqitej për shqyrtim pranë saj nga vetë institucioni i Kuvendit. Por ndonëse ka kaluar më shumë se 1 vit, çështja është zvarritur nga Kuvendi dhe ende nuk i ka shkuar Gjykatës.
Discussion about this post