Departamenti Mjekësor në Federatën Shqiptare të Futbollit organizoi ditën e sotme në ambientet e Shtëpisë së Futbollit seminarin “Jo Doping, Sport i pastër”, në bashkëpunim me Shoqatën e Mjekëve Sportivë dhe Organizatën Kombëtare Anti-Doping. Ky seminar u zhvillua për të gjithë klubet e Abissnet Superiore që ishin të përfaqësuar me doktorët dhe drejtuesit e klubeve.
Në pjesën e parë të këtij seminari referoi Violeta Shqevi, Drejtuesja e OKAD, e cila shpjegoi rolin e OKAD dhe WADA në nivel kombëtar dhe ndërkombëtar, sistemin e edukimit anti-doping dhe kodin e standardin ndërkombëtar të WADA-s, si struktura qendrore që kontrollon sportin ndërkombëtar në lidhje me përdorimin e substancave të ndaluara. Surven Metolli, Drejtori Teknik i Organizatës Kombëtare Anti-Doping, foli në lidhje me listën e medikamenteve të ndaluara që është në fuqi deri në këtë moment si edhe për përjashtimin e përdorimit terapeutik, në rastet kur një sportist mjekohet për një anomali mjekësore, trajtim që duhet të deklarohet dhe të ndiqen të gjithë protokollet.
Për zhvillimin e këtij Seminari të radhës, në kuadër të shumë të tillëve që po zhvillon Departamenti Mjekësor në FSHF së bashku me Shoqatën e Mjekëve Sportivë, për rritjen dhe përmirësimin e këtij sektori të rëndësishëm në industrinë e futbollit, ka folur për fshf.org, Gianluca Stesina, i cili u ndal te rëndësia e këtij seminari.
“Kemi zhvilluar ditën e sotme kursin e antidoping, që është një kurs që bën pjesë në serinë e disa kurseve që Federata Shqiptare e Futbollit po organizon për të përmirësuar aspektin mjekësor sportiv në Shqipëri. Kursi i antidopingut është shumë i rëndësishëm sepse është hera e parë që Federata bashkëpunon me ‘Albnado’, që është një shoqatë antidoping e që shërben për të kuptuar se si është legjislacioni i normave të antidoping në Shqipëri. Është një koncept shumë i rëndësishëm, sepse Federata dhe klubet po punojnë dhe po rriten për të arritur në nivele europiane. Legjislacioni europian i antidopingut është shumë i saktë dhe shumë përzgjedhës. Kështu, kemi dëgjuar raste që kanë dalë pozitivë futbollistë shqiptarë për shkak të gabimeve procedurale. Nuk duam që kjo të ndodhë më. Kështu, kemi zhvilluar këtë seminar, për të nisur dhënien e informacioneve se ku të gjejmë listën e barnave, te kush të mbështetem, kujt t’ia kërkojmë, cilat janë mënyrat për të proceduar, pra për të përdorur ilaçe pas konfirmimit të komisionit mjekësor. Këto takime janë shumë të rëndësishme. Pas dy muajsh, do të zhvillojmë një tjetër kurs me kategorinë e dytë, në mënyrë që gjithsesi klubet profesioniste shqiptare të mund të ketë informacion dhe të mund të rriten. Është shumë e rëndësishme të nisim, pasi kemi mësuar që ka pak vështirësi në menaxhimin e barnave. Pak konfuzion, por që është normal, si në të gjitha vendet. Por nëse nuk nisim, nuk mund të përgjigjemi. Federata synon të rritet, synon të japë përgjigje dhe përmes strukturave të saj ka nisur krijimin e këtyre kurseve të përditësimit.”
Ku duhet të përmirësohemi dhe fokusohemi së bashku me klubet? “Sipas meje ka ende disa pika që janë të panjohura dhe të tjera ku duhet të përmirësohemi. Ky seminar i sotëm na shërbeu për të kuptuar se si mund të ndihmojmë. Siç e thamë, kemi nisur një seri kursesh për të përmirësuar nivelin e njohurive në të gjitha fushat. Çështja e antidoping është pika e nisjes. Federata do t’u sigurojë ndihmë të gjithë mjekëve që do të kërkojnë për të pasur më shumë informacion në lidhje me gjetjen e barnave dhe listën kundër dopingut, cilat janë procedurat, cilat janë mënyrat për të kuptuar nëse po bën mirë apo keq. Fillimi është premtues, kemi kuptuar që kemi ende disa gjëra për të përmirësuar, por është normale, pasi kështu mund të punojmë”.
Fizioterapisti i Partizanit, Ergys Rexha, shprehet se informacioni ka qenë i cunguar dhe këto seminare ndihmojnë klubet dhe lojtarët për të mos gabuar. “Mendoj që seminarët e zhvilluar nga FSHF-ja për antidoping janë shumë të rëndësishëm, sepse siç e dimë, në Shqipëri nuk kemi shumë informacion për pjesën e anti-dopingut. Gjithsesi, duke qenë se edhe mjekët sportivë në përgjithësi kanë munguar, përveç disa figurave, na bie ne, fizioterapistëve që të merremi me këtë pjesë. Pra, ne instruktohemi për të mësuar më tej lojtarët që të mos marrin substanca të gabuara”, u shpreh Rexha.
Discussion about this post