Gjykata e Posaçme ka zbardhur vendimin që dënoi me dy vite burg ish-kryebashkiakun e Kukësit Safet Gjicin dhe me një vit burg Alma Kaçin. Kjo e fundit kreu një akt seksual në zyrën e kryetarit të bashkisë dhe e filmoi atë. Videoja më pas u bë virale.
Në vendin e Gjykatës thuhet ndër të tjera se Alma Kaçi është paguar nga Abedin Oruçi që i ka kërkuar që të kryejë aktin seksual me Safet Gjicin dhe ta filmojë atë.
“Gjykata vlerëson se për të konkluduar drejtë mbi qëllimin e kryerjes së aktit seksual si edhe identifikimin e personave të përfshirë duhet një analizë e plotë e provave dhe indicieve. Nga analiza e provave rezulton qartazi se që në momentet e para të shkuarjes së të pandehurës Alma Kaçi në zyrën e të pandehurit Safet Gjici dhe gjatë gjithë kohës në komunikimet e saj është drejtpërdrejtë i interesuar shtetasi Abedin Oruçi. Gjykata nga një analizë e kujdesshme dhe e plotë e provave e indicive, krijon bindjen se e pandehura Alma Kaçi ka kryer një shërbim seksual kundrejt pagesës së kryer nga shtetasi Abedin Oruçi”, thuhet në vendim.
Ish-kryebashkiaku Safet Gjici është dënuar nën akuzën për shpërdorim detyre me dy vite burgim, duke përfituar nga gjykimi i shkurtuar, ndërsa Alma Kaçi me 1 vit burgim nën akuzën e prostitucionit.
Discussion about this post