Në lidhje me protestën e sotme (19 prill) të opozitës para Bashkisë së Tiranës, ka reaguar edhe Prezenca e OSBE në Shqipëri.
OSBE shkruan se protesta paqesore është një akt demokratik dhe legjitim, jo dhuna, duke e dënuar këtë të fundit.
“Prezenca e OSBE-së në Shqipëri dënon aktet e dhunës gjatë protestës së sotme përpara Bashkisë së Tiranës. Protesta paqësore është akt demokratik legjitim, dhuna jo”, thuhet në reagim.
Për të tretën herë pas arrestimeve të drejtorëve të Erion Veliajt, këtë të premte, u protestua para Bashkisë Tiranë. Tubuesit kërkuan dorëheqjen e kryebashkiakut që e cilësojnë “kokën e bandës së drejtorëve hajdutë” dhe “pronarin faktik të inceneratorit të Tiranës”.
Gjatë protestës, u hodhën molotov drejt bashkisë, ndërsa pati momenti mes policisë dhe tubuesve, teksa këta të fundit kërkuan heqjen e barrierave metalike të vendosura nga uniformat blu, si masa shtesë sigurie.
Skena të ngjashme u shënuan edhe gjatë protestës së dytë të zhvilluar pas aferës “5D”, disa ditë më parë. Ndryshe nga ajo herë, këtë të premte, rreth 1 orë pas përfundimit të protestës, delegacioni i BE-së dhe ambasada amerikane reaguan njëra pas tjetrës.
Discussion about this post