Asambleja e PAA, Duka: Zyrtarë të lartë të qeverisë janë kthyer në biznesmenë, të nisim punën për zgjedhjet e 2025

Partia Agrare Ambientaliste po mban Asamblenë Zgjedhore. Kryetari i PAA, Agron Duka, në fjalën e tij, tha se vendi ndodhet në një situatë të vështirë ku korrupsioni është kthyer në rrezik për shoqërinë dhe ekonominë.

Duka vuri në dukje se zyrtarë të lartë janë shndërruar në biznesmenë dhe po marrin tendera. Kreu i PAA deklaroi se kjo ka shkatërruar konkurrencën e lirë, ekonominë e tregut dhe sipas tij, e ka kthyer në monopol të kontrolluar nga një grusht njerëzish, “shpesh në partneritet edhe me krimin”.

Ai theksoi se teksa mazhoranca kërkon mandatin e katërt, përballë saj qëndron një opozitë që nuk le shumë vend për t’u krenuar.

Duka shtoi se duhet të nisë puna për zgjedhjet e 2025, ndërsa theksoi se kjo duhet bërë duke shkuar tek populli dhe duke dëgjuar problemet e hallet e tyre.

“Në Tiranë e Shkodër kishim rezultate zhgënjyese ku nuk morëm asnjë këshilltar. Puna duhet të nisë që tani për rezultate të mira. Shqipëria në një situatë të keqe, korrupsioni është rrezik për shoqërinë dhe ekonominë. Zyrtarë të lartë janë shndërruar në biznesmenë janë bërë pjesëmarrës në tendera, kjo ka shkatërruar konkurrencën e lirë, ekonominë e tregut, e ka bërë ekonominë në monopol të kontrolluar nga një grusht njerëzish, shpesh në partneritet edhe me krimin. Maxhoranca parlamentare voton në mënyrë të verbër çdo projektligj që vjen edhe kur ata vetë janë të bindur se është në dëm të interesit të vendit dhe shoqërisë. Një maxhorancë nuk ka marrë në konsideratë asnjë pr.ligj të propozuar nga opozita. Është shtuar presioni ndaj opozitës dhe është rritur kontrolli mbi mediat”, tha Duka.

“Shpresa ka mbetur tek manipulimi i publikut, e keni parë se si çdo mëngjes ministra, drejtorë dhe nënpunës të administratës shpërndajnë në rrjetet sociale foto e lëndina, kodra e lumenj. Përballë maxhorancës që kërkon mandatin e katërt qëndron një opozitë që nuk le shumë vend për t’u krenuar. Opozita humbi 3 vite duke u përçarë, e ndarë në disa grupe ku rivaliteti dhe agresiviteti brenda PD-së ia kaloi atij në maxhorancën qeverisëse, duke marrë madje trajtën e një armiqësie të vërtetë dhe personale”, shtoi kreu i PAA-së.