Ditën e sotme u zhvillua Konferenca Kombëtare “Për sigurinë e turizmit në Shqipëri”, gjatë fjalës së saj Ministrja Belinda Balluku njoftoj së në fund të qershorit do të hapet tuneli i Llogarasë dhe aksi Thumanë-Kasharë.
“Ky do të jetë një vit me shumë dorëzime veprash dhe me shumë hapje kantieresh të reja. Të gjithë më pyesin nëse e kam seriozisht kur them që Thumanë-Kashar një nga akset rrugore pjesë e Korridorit Blu dhe më kyçe të këtij korridori pasi do të jetë ajo që do të shpëtojë një herë e mirë të gjithë trafikun që prej vitesh me të vërtetë e kemi pasur problem. E kam seriozisht, më 30 Qershor Thumanë-Kashar do të jetë një aks i përshkrueshëm. Ajo do të jetë dita kur çdo automjet do ta përshkrojë atë aks dhe për më tepër ne me shumë gëzim do t’ia dorëzojmë policisë që të nisë operacionet dhe të ketë monitorim të plotë. Gjithashtu më 30 Qershor, por do t’i koordinojmë, nëse Thumanë-Kashar hapet me 30 Qershor, atëherë tuneli i Llogarasë do të hapet një ose dy ditë më pas pasi edhe forcat tona duhet të jenë të përqendruara. Do të hapim tunelin e Llogarasë që në opinionin tim është perla e infrastrukturës shqiptare. Një tunel prej 6 kilometrash, një tunel që do ta quaja vepër arti edhe për shkak se gjeologjia na ka ndihmuar atje, ndryshe nga tuneli i Murrizit, por edhe ai tunel do të dorëzohet brenda vitit 2024 duke mbyllur njëherë e mirë Rrugën e Arbrit”, tha ajo.
Gjatë muajit Maj, ajo tha do hapen dy gara ndërkombëtare për dy porte “një nga ajri dhe një nga deti”. Bëhet fjalë për portin tregtar të Porto Romanos në Durrës dhe gara për aeroportin e Gjirokastrës.
Discussion about this post