Një çift të moshuarish janë gjetur të pajetë në banesën e tyre në fshatin Bodrisht të Devollit mëngjesin e kësaj të enjteje. Policia konfirmoi se në trupat e pajetë janë konstatuar shenja dhune.
Dyshimet paraprake janë se bashkëshortët Kosta Ilia 84 vjeç dhe Kleoniqi Ikia 88 vjeçe, janë dhunuar për vdekje. Rrethanat e ngjarjes mbeten ende të paqarta.
Ngjarja
Të dy të moshuarit jetonin vetëm dhe nuk kishin fëmijë. Mësohet se ka qenë motra e të moshuarit e cila jeton në Athinë, e cila ka tentuar të komunikojë me çiftin përmes telefonit, por i vëllai dhe gruaja e tij nuk përgjigjeshin. Atëherë ajo ka njoftuar fqinjë, të cilët kanë shkuar në banesë.
“Rreth orës 08:00, janë gjetur nga fqinjët, të pajetë, në banesën e tyre në fshatin Bodrisht, Kosta Ilia 84 vjeç dhe Kleoniqi Ikia 88 vjeçe. (bashkëshortë). Nga këqyrjet paraprake të trupave të 2 shtetasve, janë konstatuar shenja dhune, dyshohet të shkaktuara me mjete të forta rrethanore”, njoftoi policia.
Të njëjtat burime shtuan se “nga këqyrja paraprake e vendit të ngjarjes, nuk janë konstatuar thyerje të dyerve apo dritareve, si dhe në brendësi të banesës nuk janë konstatuar çrregullime të orendive”, duke përjashtuar kështu (të paktën paraprakisht) pistën e një grabitjeje me dhunë.
“Menjëherë pas njoftimit, shërbimet e Policisë kanë shkuar në vendngjarje dhe së bashku me grupin e posaçëm hetimor të ngritur për këtë rast, në drejtimin e Prokurorisë, po vijojnë hetimet intensive për sqarimin e rrethanave të ngjarjes”, thuhet më tej në njoftimin e bluve.
Dyshimet
Burime pranë policisë thanë se nuk përjashtohet pista që të moshuarit të jenë përleshur me njeri-tjetrin dhe për pasojë të kenë humbur jetën. Megjithatë, hetimet e mëtejshme pritet të verifikojnë këtë hipotezë.
Një nga fqinjët tha për gazetarët se dy të moshuarit kishin konflikte me njeri-tjetrin.
Discussion about this post