Në muajin Mars 2024, në vendin tonë janë regjistruar 107 aksidente dhe krahasuar me të njëjtën periudhë të një viti më parë, kanë ndodhur 16 aksidente më shumë.
Sipas të dhënave zyrtare nga INSTAT, aksidentet rrugore, në 87,9 % të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 25-34 vjeç, duke zënë 31,8 % të numrit të aksidenteve gjithsej.
Ekspertët e sigurisë rrugore thonë se shkaqet kryesore për shtimin e aksidenteve nga shoferët e rinj janë drejtimi i mjetit në mënyrë të shkujdesur, si dhe mosnjohja e Kodit Rrugor.
“Ka të bëjë me sjelljen e gabuar të tyre dhe agresive, përdorimi i celularit me vend dhe pa vend, shpërqendrohu në mënyrë të pakuptimë në rrugë, nuk dinë të kryejnë parakalimet. Drejtuesit e rinj janë të pamirëinformuar me kërkesat që parashikon Kodi Rrugor”.
Në tremujorin e parë të vitit 2024 janë shënuar 377 aksidente rrugore, 43 % më shumë sesa vjet. Numri më i lartë i tyre është kryer nga grup-mosha 25-34 vjeç. Për të shmangur shtimin e këtyre aksidenteve dhe fatalitetin e shkaktuar prej tyre, ekspertët kërkojnë mirëedukimin e shoferëve që në autoshkolla.
“Siguria rrugore ka rënë. Duhet ta vlerësojnë seriozisht situatën, është cenuar rëndë siguria rrugore e shtetasve, të cilët për të marrë një rrugë duhet të mendohen mirë. Ju bëj thirrje drejtuesve të mjeteve që të përgatiten mirë në autoshkolla”.
Discussion about this post