Ushtria ruse nisi një sulm këtë fundjavë në rajonin e Karkovit në Ukrainë. Pesë batalione kanë hyrë në brendësi të zonave nën kontrollin e Kievit, duke thyer pjesë të frontit.
Sipas ushtarakëve ukrainas, Kremlini ka ndërmarrë sulm të gjerë në këtë rajon ndërsa ka pushtuar një sipërfaqe prej 30 kilometrash katrorë.
“Rusia ka nisur një valë të re sulmesh në frontin në Karkiv. Ne kemi kundërsulmuar me trupat dhe artilerinë tonë. Duhet të dërgohen më shumë forca në atë pozicion. Në zonë është duke u zhvilluar një betejë e ashpër”, tha presidenti i Ukrainës Volodymyr Zelensky.
“Reuters” shkruan se qëllimi i rusëve është të shtyjnë forcat ukrainase 10 kilometra brenda territorit ukrainas dhe të krijojnë një zonë tampon. Po ashtu, ky sulm i rëndë rrezikon të hapë një “front të ri” në Ukrainë.
Sipas amerikanëve, rusët po përgatiten për një sulm të gjerë në qytetin e dytë më të populluar të Ukrainës.
‘Rusët po përgatiten për një sulm më të madh në Karkov. Kemi të dhëna se po përgatiten të përdorin armatim me rreze të gjatë veprimi në këtë betejë”.
Gjatë muajve të fundit, forcat ukrainase kanë përdorur Karkovin si trampolinë për të nisur sulme me dron dhe raketa në rajonet kufitare ruse.
Discussion about this post