Shpërngulja e administratës/ Kryebashkiaku i PS: Mbi 7 mijë vetë nga Shqipëria në Athinë për mitingun e Ramës

Një kryebashkiak socialist pranon se mijëra vetë kanë udhëtuar nga Shqipëria në Athinë për të marrë pjesë në mitingun e kryeministrit Rama.

Mariglen Disha, Kryetar i Bashkisë Librazhd thotë për gazetarin e emisionit “Piranjat” se është mbi 7 mijë numri i atyre që kanë kaluar kufirin grek për të qenë pjesë e mitingut të Ramës me emigrantët në Athinë.

Deklarata shton një tjetër dëshmi për shpërnguljen e administratës drejt kryeqytetit grek, me qëllimin për të shërbyer si dekor i një salle të mbushur, gjatë takimit të Ramës me emigrantë.

Ishin denoncime nga opozita dhe më pas raportimet në mediat greke që lajmëruan shpërnguljen e administratës me urdhër politik. Postimet në rrjetet sociale, ku kryebashkiakët e PS shfaqeshin bashkë me nëpunësit në kryeqytetin grek i përforcuan dyshimet.

Megjithatë, kryeministri Edi Rama nxitoi të mohojë shpërnguljen e administratës. Por, gënjeshtrës së kryeqeveritarit i ‘doli boja’ shpejt nga raportimet e mëtejshme mediatike.

Emisioni “Piranjat” transmetoi dëshminë e drejtorit të teatrit “Bylis” në Fier, Klajdi Marku. Ky i fundit, gjatë një bisede me gazetarin e emisionit, pa e ditur se po filmohet, është shprehur se ka qenë i detyruar të jetë prezent në aktivitetin politik. “E bëre fotografinë, i thua ja isha, e hedh online. Marrim rrogën vëlla ç’të bëjmë…”, shpjegon ai, duke dëshmuar përdorimin e administratës për qëllime politike dhe elektorale nga Partia Socialiste dhe kryetari i saj.

Një ditë pas transmetimit të kësaj deklarate, drejtori njoftoi dorëheqjen dhe u justifikua duke u shprehur se “bëri shaka” me atë që tha.

Këtë të mërkurë, publikohet dëshmia e një kryebashkiaku socialist i cili thotë se mbi 7 vetë nga Shqipëria shkuan në takimin e Ramës në Athinë. Deklarata e Dishës është shpërndarë në rrjetet sociale nga kreu i PD-së Sali Berisha i cili me nota ironie shkruan: Uroj të mos ketë fatin e drejtorit të Fierit.