Një aksident u shënua pasditen e sotme gjatë turit çiklistik Vlorë-Himarë-Llogara. Tre çiklistë janë përplasur në aksin Kuç-Qeparo teksa garonin në edicionin e 81-të të turit çiklistik të Shqipërisë. Dy prej tyre raportohet se janë në gjendje të rëndë.
Çiklistët u përplasën me njëri-tjetrin teksa po kryenin etapën e katërt të këtij edicioni, e cila përfshin itinerarin Vlorë-Himarë-Llogara.
“Rreth orës 14:40, në aksin rrugor Kuç-Qeparo, gjatë itinerarit të garës të etapës së katërt të Turit të 81-të Çiklistik të Shqipërisë, 3 prej çiklistëve dyshohen se kanë humbur kontrollin mbi drejtimin e biçikletave dhe si pasojë kanë dalë nga rruga. Të tre çiklistët janë transportuar në spital për ndihmë mjekësore. Grupi hetimor po punon për zbardhjen e plotë të rrethanave të aksidentit”, njoftoi policia.
Edicioni i 81-të i çiklizmit startoi më datë 20 të këtij muaji nga sheshi ‘Skëndërbej’ në Tiranë.
Aktualisht, zhvillohet etapa e katërt dhe pritet të zhvillohet dhe etapa e pestë dhe e fundit e cila starton nesër në orën 10:00 nga Vlora për në Fier.
Garat vlejnë gjithashtu për Olimpiadën e Parisit.
Discussion about this post