Zhdukja e të riut, i vëllai: Polici serb më tha që mund të ketë vdekur

në Aktualitet

Kohë leximi: 3 min

Në emisionin “Me zemër të hapur” në News24, kanë folur familjarët e 34-vjeçarit të zhdukur, Leo Roci.

Nga Serbia në një lidhje direkte ka folur vëllai i Leo Rocit, Bledi.

Ai është shprehur se ndodhet në Serbi së bashku me nënën e tij për të marrë informacione se çfarë ndodhi me vëllain e tij. Ndonëse ende nuk kanë dinë se çfarë ka ndodhur me 34-vjeçarin.

Bledi Roci thekson se duhet patjetër që ambasada shqiptare në Beograd ta ndihmojë. “Duhet të gjej taksistin me të cilin udhëtoi vëllai im por edhe çobanin që i gjeti sendet personale”, u shpreh vëllai i Leo Rocit.

Gjithashtu tregon vështirësitë që së bashku me nënën e tij po kalojnë në Serbi.

Madje ai tregon se një efektiv serb i ka thënë që Leo nuk është as i arrestuar dhe as në burg, duke iu shprehur se mund edhe të ketë humbur jetën.

“Jam i interesuar të di ça bëhet me vëllain. Një polic na ka thënë që ky person mund edhe të ketë vdekur, nuk e di ku bazohet polici që ma tha këtë, ai më tha këtu djali nuk u kap. Akoma nuk ka një përgjigje se ne nuk na pranuan të bënim denoncimin që ne komunikimin me vëllain e humbëm në shtetin Serb. Unë e mami im kemi shkuar të bëjmë denoncim, mamit i kanë marrë pasaportë për 2-3 minuta e na thënë ikni se jua morëm denoncimin. Nuk e njoh atë që udhëtoi me vëllain tim, nuk jam i sigurtë nëse ka kaluar apo jo por deri në pikën kufitare të Serbisë me Kroacinë ai ka qenë mirë unë kam folur me të. Unë kam folur edhe me Ambasadën Shqiptare në Beograd ata më thanë ne kemi bërë kërkesa presim të marrim përgjigje. Kam shkuar tek komisariati ku u dorëzuan sendet e vëllait.

Mendja nga nuk më shkon, por nuk kam informacione të sakta. Polici që kam takuar në komisariat më tha ai i arrestuar nuk është as në burg nuk është. Sendet personale nuk mi kanë treguar se ku i kanë gjetur, janë gjetur 60 mijë lekë të vjetra, telefoni dhe pasaporta janë gjetur dhe janë dorëzuar në komisariat. Unë nuk i mora sendet e tij sepse dua që shteti shqiptar e ambasada ti marrin dhe të hetojnë. Nga Prishtina në Serbi ai është futur nëpër dogana se nuk ka pasur probleme as me Serbinë e as me Kosovën, sa për atë taksistin unë dua ta kërkojë ta di kush ishte”, tha ai.