Në këto valë tenderësh pa garë që po raportojmë, i erdhi radha bashkisë së vogël të Pustecit. Këtu pavarësisht buxhetit të vogël, shpërdorimet qenkan të mëdha! Më konkretisht, më datë 11 prill 2024, kryetari i Bashkisë Pustec, Pali Kolefski, ka hapur tenderin me numër reference REF-00812-04-10-2024 dhe objekt “Blerje Fadrome”. Dhe fondi i caktuar për blerjen e mjetit është 91. 2 milionë lekë.
Deri më datë 22 prill 2024 ka qenë afati i fundit i dorëzimit të ofertave, kur kane dorëzuar propozimet 8 firma. Duke qenë se shpallja e fituesit u shty me gati dy muaj, menduam që kryetari ka ndjekur ligjin dhe po merret me shqyrtimin e ofertave.
Por, nuk ka ndodhur kështu, pasi në këtë rast kemi të bëjmë me eliminim të menjëhershëm të konkurrentëve që në fazën e parë. Dhe u la për në “finale” vetëm oferta e firmës që me sa duket ishte e paracaktuar.
Sipas të dhënave në dokumentacionet e tenderit, vetëm për firmën “Compi Tel” janë dhënë arsyet e skualifikimit, ku thuhet se ka paraqitur ofertë anomalisht të ulët. Ndërsa për kompanitë e tjera nuk janë dhënë argumentet mbi të cilat është vendosur pavlefshmëria e ofertave të tyre. Kështu, në mënyrë të dyshimtë dhe të fshehtë iu hap rruga firmës “START CO”, që kishte ofertë me vlerë rreth 80 milionë lekë.
Për këtë mungesë konkurrence, Open Data Albania i ka vendosur “Flamurin e kuq”, duke treguar kështu se kemit bëjmë me një rast abuziv. Kujtojmë se kjo është shenja e riskut të korrupsionit.
Firma që mori fondin “START CO” është në pronësi të Shupo Qendros, njeriu i afërm i prefektit të Tiranës, Afrim Qëndro.
Lidhja me prefektin është një kartëvizitë e mirë nëpër tendera të cilat kompania i fiton pa garë, sidomos nga bashkia Tiranë.
Edhe vetë kryebashkiaku i Pustecit është zyrtar që krijon nepotizëm në institucionin e tij. Pak kohë më parë një emision investigativ raportoi se në këtë bashki ishin punësuar miqtë e kryetarit.
Në lidhje me këtë Kolefski u justifikua që për shkak se njerëzit kanë ikur, të gjithë në atë zonë kanë lidhje miqësore apo familjare me të. Madje ai ka pranuar se ka lidhje familjare me ata që ka emëruar në këshill si kunatën e tij, tek ujësjellësi apo edhe tek zjarrfikëset ku ka emëruar vëllain e vet.
Ndërsa rasti i fadromës tregon se kryetari i bashkisë nuk pyet shumë për paratë e buxhetit të shtetit, por vendos sipas interesit. Madje i shkel edhe klriteret që vendos formalisht në prokurim. Konkretisht, firma fituese do të duhej të dorëzonte bilancin financiar të tre viteve të fundit në komisionin e tenderit. Zyrtarisht, sipas dokumentit të mëposhtëm, kompania rezulton se nuk e ka depozituar pasqyrën financiare vitit 2023 as në QKB, që është një detyrim.
Nga ana tjetër, ne nuk gjejmë në dokumentet e tenderit mënyrën se si e ka përcaktuar fondin limit bashkia Pustec. Së pari, duhej bërë një studim, nëse bashkisë i del më lirë të kontraktojë një mjet të tillë me qira, apo ta blejë dhe ta mirëmbajë fadromën.
Së dyti, këtu më poshtë po ju sjellim çmimet në këtë moment të fadromave nga disa vende evropiane të njohura për prodhimin dhe tregtimin e tyre. Të gjitha janë poshtë çmimit me të cilën është firmosur kjo kontratë.
Kujtojmë se çmimi me të cilin është lidhur kontrata është pa TVSH, pra i bie që bashkia Pustec po e blen fadromën me 9479980 lekë përfshirë taksën e vlerës së shtuar.
Ky kryetar duhet ndaluar së firmosuri kontrata të tilla që vijnë era korrupsion, prandaj Agjencia e Prokurimeve Publike duhet ta hetojë, por edhe KLSH ta mbikëqyrë shpërdorimin e parave të arkës së bashkisë Pustec.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post