Kryetari i Bashkisë Divjakë, Josif Gorrea, ka hedhur për kosha 33 milionë lekë. Blerja e një numri koshash është e justifikuar po të shohësh gjendjen e pastërtisë në rrugët e Divjakës, por tenderi i zhvilluar ka brenda abuzimin me këtë ide.
Më konkretisht, më datë 17 maj 2024, bashkia shpalli prokurimin me objekt ‘Blerje kosha metalik për mbetjet për nevojat e Agjencisë së Shërbimeve Komunale’. Fondi limit që është lënë në dispozicion për këtë tender është 33 milionë lekë.
“Për argumentimin e sasisë së materialit të përllogaritur për objektin e mësipërm është kryer kontroll në zonën urbane dhe rurale ku Agjencia e Shërbimeve Komunale realizon largimin e mbetjeve urbane shikohet e domosdoshme dhe emergjente blerje e këtyre koshave metalik xingato për të përmirësuar procesin e grumbullimit të mbetjeve urbane, pasi koshat ekzistues nuk janë të mjaftueshëm”, thuhet në dokument.
Kështu, kryetari Gorrea para sezonit turistik po bën një rinovim koshash, por më shumë ka menduar të gostis një mikun e vet me kontratën e furnizimit. Për 12 ditë u mbajt e hapur procedura për të dorëzuar ofertat.
Por vetëm firma “ARTEO 2018” Sh.p.k. me pronar Artan Topin paraqiti një propozim me vlerë 32 milionë lekë, sa 97% e fondit limit.
Ofertë e shtrenjtë për bërjen e disa kazanëve dhe mungesa e konkurrencës ishin dy arsye shumë të rëndësishme të cilat duhet t’a detyronin kryebashkiakun të anulonte tenderin. Por, Gorrea e paska më mirë që të anashkalojë ligjin. Si përfundim “ARTEO 2018” Sh.p.k. përfitoi tenderin pa garë.
Open Data Albania e vlerëson këtë prokurim me risk për korrupsion, prandaj i ka vendosur ‘Red Flag’.
Nga një kërkim për aktivitetin e kësaj bashkie në evidentuam se çdo vit Bashkia Divjakë blen kosha ose shpenzon për larjen e koshave. Madje shpenzimet kanë ardhur në rritje nga viti në vit.
Në fillim e nisi me fonde më të ulëta dhe me kontratat më të rregullta, ndërsa tani është kaluar në proces abuzimi.
Po ku i çon Gorrea tërë këto kosha që blen çdo vit, pasi në 2023 bleu 50 kosha, ndërsa 1050 kosha ishin blerë në vitin 2022 e kështu me radhë. Tani ose janë kosha të cilësisë së ulët dhe prishen brenda viti, ose janë justifikim për nxjerrjen e fondeve nga arka e bashkisë. Për këtë duhet Kontrolli i Lartë i Shtetit të auditojë se ku ka në shkuar paratë. Po ashtu agjencia e Prokurimeve të kryejë hetim administrativ për kontratën e fundit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post