Drejtori i Autoritetit Kombëtar të Ushqimeve, Bledar Skënderi është shkarkuar ditën e sotme me vendim të Këshillit të Ministrave, gjatë mbledhjes së sotme. Mësohet se drejtoresha e re e AKU-së është emëruar Jeta Deda. Skënderi u padit në SPAK më shumë se një muaj më parë, pasi akuzohet për shpërdorim detyre. Ky kallëzim erdhi pas tregtimit të produkteve të cilat u cilësuan nga Komisioni Europian si kancerogjene. Kryesisht bëhej fjalë për akullore dhe çokollata nga firma të njohura.
“Nga auditimi i ushtruar, Kontrolli i Lartë i Shtetit ka evidentuar mosveprime të Drejtorit të Drejtorisë së Përgjithshme të Autoritetit Kombëtar të Ushqimit, të cilat janë në kundërshtim flagrant me ligjin dhe aktet nënligjore që rregullojnë veprimtarinë e institucionit të drejtuar prej tij. Për mosveprimet e Drejtorit të DPAKU, KLSH ka depozituar kallëzimin penal në Prokurorinë pranë Gjykatës së Shkallës së Parë Tiranë, për veprën penale “Shpërdorim detyre”, parashikuar në nenin 248 të Kodit Penal”, thuhet në njoftimin e KLSH.
Discussion about this post