Një tjetër protestë u zhvillua këtë të premte në Roskovec nga banorët e fshatrave Suk 1, Suk 2, Strum, Jagodin dhe Arapaj, kundër vendimit për ndërtimin e një termocentrali në këtë zonë.
Banorët e fshatrave ku është planifikuar ndërtimi i termocentralit janë shprehur kundër vendimit të Këshillit të Bashkisë Roskovec të datës 26 prill, që miratoi me votat e maxhorancës planin vendor që përfshin ndërtimin e termocentralit në zonën e fshatit Suk 1.
Banorët pohojnë se nuk janë pyetur për këtë projekt dhe shtojnë se duke pasur parasysh dëmet që ky termocentral mund të shkaktojë në tokat bujqësore dhe mjedisin, do të vazhdojnë betejën ligjore dhe protestat.
Një banor, i cili është kthyer nga Italia me djalin e tij dhe ka investuar duke blerë 15 hektarë tokë për të punësuar të rinj, tha për mediat: “Jam i detyruar t’i marr në Itali këta të rinj pasi ndërtimi i TEC do t’i nxjerrë të gjitha tokat jashtë përdorimit.”
Në mbështetje të banorëve ka qenë edhe avokati Altin Goxhaj, i cili ka theksuar se projekti për ndërtimin e TEC në fshatin Suk është një projekt që garanton helmimin, vdekjen dhe shkatërrimin e zonës.
Për rastin, banorët kanë bërë edhe një kallëzim në Prokurorinë e Posaçme.
Banorët kanë zhvilluar disa protesta kundër projektit, që është kundërshtuar edhe nga opozita.
Discussion about this post