Gjendet në mes rrugës në Lezhë me fraktura të rënda në kokë i riu nga Shkodra (Emri)

Një i ri nga Shkodra, i identifikuar si Gentian Bajrami, është gjetur i dhunuar pranë rreth rrotullimit të Shëngjinit në Lezhë.

Burime bëjnë me dije se ai ka patur fraktura në kokë, teksa është marrë nga autoambulanca, e cila e ka çuar drejt spitalit të Lezhës.

Mësohet se pasi ka marrë ndihmën e parë në këtë spital, i riu është dërguar më pas në spitalin e Traumës në Tiranë.

Policia ka nisur hetimet për zbardhjen e ngjarjes, teksa ende nuk dihen se si kanë ndodhur rrethanat e këtij rasti.

Dyshohet se ai është rrëzuar nga lartësia e një lokali. Ai ka dëmtuar kokën dhe ndodhet në gjendje të rëndë shëndetësore.

“Rreth orës 06:05, salla operative e Policisë së Lezhës është njoftuar nga spitali rajonal i Lezhës, se në afërsi të rrethrrotullimit të Shëngjinit, është marrë me autoambulancë, i dëmtuar në kokë, shtetasi G. B., 22 vjeç. Nga hetimet e deritanishme dyshohet se 22-vjeçari ka rënë aksidentalisht nga lartësia e një lokali në vendin ku është gjetur i dëmtuar”, thuhet në njoftimin e policisë.