Luan me Aston Villan, por Ollie Watkins është heroi i një Anglie të tërë. Sulmuesi 28-vjeçar ishte deçiziv me golin e shënuar në gjysmëfinalen e Euro 2024, aty ku “Tre Luanët” përmbysën 1-2 në limite Holandën dhe gjejnë Spanjën në finalen e 14 korrikut në Berlin.
I futur vetëm në minutën e 81-të së bashku me Palmer, Watkins shënoi në minutën e 90-të në rastin e fundit. Pas ndeshjes ai zbuloi edhe një “sekret”, duke parashikuar golin.
“E pabesueshme, e kam pritur këtë moment me javë të tëra. M’u desh shumë punë dhe ia dola në ndeshjen më të rëndësishme të Europianit deri tani. Jam shumë i lumtur që e pata këtë mundësi, jam vërtet mbi re. Betohem për jetën e fëmijëve të mi, hyra në fushë njëherazi me Palmer dhe në momentin e zëvendësimit i thashë: ‘Tani më duhet asisti yt për golin’. Dhe kështu shkoi. Kishte shumë kritika, por në fund jemi në finale dhe kjo është e vetmja gjë që ka rëndësi. Tek ne ekziston dëshira për të mos u dorëzuar kurrë. Tani jemi gati për Spanjën”, tha 28-vjeçari.
Discussion about this post