Nis sot në Gjykatën e Sarandës procesi penal për ish deputetin e Partisë Demokratike Gani Hoxha, ish Drejtoreshën e ASHK Sarandë Aida Demi dhe dy ish specialistët e ASHK Sarandë, Erald Lika dhe Ermen Stroka. Dosja është shortuar disa ditë më parë dhe do të shqyrtohet nga gjyqtari Entiljano Spahiu. Seanca e parë nis sot në orën 10.30 dhe ka si objekt dërgimin e cështjes në gjyq.
Në 12 maj të këtij viti, pas një hetimi 10 mujor nga Prokuroret Silvana Belishta dhe Valbona Maja, ndaj ish deputetit dhe dy ish specialistëve të ASHK u caktua masa e sigurimit “Arrest në shtëpi” ndërsa ndaj ish drejtoreshës së ASHK u caktua masa “detyrim paraqitje” dhe “ndalim dalje jashtë shtetit”. Hoxha akuzohet për “falsifikim dokumentash” ndërsa Demi, Lika e Stroka akuzohen për “shpërdorim detyre”. Pas rreth 1 muaji, Gjykata e Apelit në Tiranë i zëvendësoi masat duke caktuar ndaj të katërtve vetëm “detyrim paraqitje”.
Zyrtarët e ndaluar mësohet se kanë legalizuar një objekt 4 kate në hyrje të qytetit të Sarandës me sipërfaqe ndërtimi për banim 1359 m2 dhe me sipërfaqe 1056 m2 aktivitet social ekonomik, duke i bashkangjitur edhe një truall 1000 m2. Objekti bashkë me truallin më pas është pajisur me certifikatë pronësie në emër të shtetasit Gani Hoxha. Prokuroria e cilëson legalizimin dhe regjistrimin e pronës si të paligjshëm, pasi kjo pronë realisht është e regjistruar në emër të familjes Sejko dhe është përfituar nga Hoxha me dokumenta të falsifikuara.
Discussion about this post