Kryetari i Bashkisë Maliq, Gëzim Topçiu, ka bërë golin e radhës me paratë e buxhetit. Zyrtari ka bërë një biznes me Shpresa Nikën, teksa i ka përjashtuar të gjithë konkurrentët përveç saj. Dhe i ka firmosur kontratën 433 milionë lekë kompanisë me bazë në Kamëz, që përfiton nga kryesisht nga favorizimi kryebashkiakëve për të marrë fonde.
Këtë herë kryetari ka planifikuar të ndërtojë një palestër shkolle. Më konkretisht, bëhet fjalë për tenderin me objekt ‘Ndërtim palestër gjimnazi Pirg’. Nga fotot e projektit shohim që do të ndërtohet godina dhe do të kryhen instalimet.
Fondi limit i caktuar është 36.348.948 lekë (pa TVSH) ndërsa përfshirë TVSH është 43.318.738 lekë. Këtu, komisioni i Topçiut ka futur edhe një tavan tjetër brenda fondit limit, ku cakton që vlera e pajisjeve të mos jetë më e madhe se 1.500.000 lekë. Në këtë mënyrë, bëhen dy tendera brenda një procedure.
Vlera e ndërtimit të palestrës mund të ishte më e ulët dhe këtë e vërtetojnë ofertat e bëra nga kompanitë pjesëmarrëse.
Nga ana tjetër, fryrja e fondit limit ka skualifikuar ose ka mbajtur larg tenderit kompani që mund të mos kenë realizuar kontrata me të tilla shifra.
Sipas dokumenteve të publikuara nga Agjencia e Prokurimeve publike, për këtë projekt kanë shfaqur interes 13 kompani. Prej tyre veçojmë firmën “I.C.C GROUP” shpk që kishte ofertën më ekonomike, me vlerë 250 milionë lekë. Megjithatë, komisioni i Topçiut e ka skualifikuar këtë firmë nga gara me arsyetimin se pjesa e propozimit të bërë për pajisjet e kalon vlerën që ka vendosur Autoriteti Kontraktor. Pra, Topçiu brenda ofertës detyron edhe çmimet e njësive të ndryshme. Kjo nuk është një arsye për skualifikim, sepse konkurrimi bëhet në bazë të shumatores së çmimeve.
Situata komplikohet dhe vendimi bëhet anormal, kur skualifikohen menjëherë më pas edhe 11 ofertat të tjera. Dhe bie në sy që janë skualifikuar me argumente që nuk qëndrojnë. Për shembull, disa operatorë janë skualifikuar se nuk kanë paraqitur punë të ngjashme të kryera më parë. Ky është kriter subjektiv, sepse nëse ke ndërtuar një godinë të paktën dykatëshe, nuk ke pse të mos e realizosh edhe ndërtimin e një palestre.
Në një rast, kompania e skualifikuar ka deklaruar se mbështet në dy partnerë të tjerë për disa zëra të punimeve. Argumentimi i skualifikimit se “nuk ka paraqitur me shkrim marrjen përsipër të detyrimeve nga operatorët e tjerë”, tregon se pjesëmarrësi nuk është njoftuar për këtë mangësi.
Përndryshe nuk i kushtonte gjë operatorit të dorëzonte një marrëveshje me shkrim.
Siç duket, Topçiu e kishte vendosur më parë që ky fond do të xhirohej në llogarinë e Shpresa Nikës. Sipas planit të tij, Topçiu ka çuar për në fazën finale vetëm firmën “Nika” shpk, në pronësi të Shpresa Nikës. Kompania e saj u shpall menjëherë përfituese e kontratës më datë 22 korrik 2024.
Open Data Albania i ka vendosur tenderit ‘Flamurin e Kuq’, për mungesë konkurrence dhe abuzim me fondin limit. Kjo është shenja treguese e riskut të korrupsionit.
Kështu, Topçiu goditi sërish në “shenjë”, sepse është mësuar me tenderat duke qenë në këtë post qysh prej vitit 2000. “Unë e dashuroj këtë punë”, do të përgjigjej Gëzim Topçiu, kur i drejtuan gjatë fushatës së fundit pyetjen “A nuk u ngope?”
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post