Kreu i Bankës së Shqipërisë, Gent Sejko, ka dalë sot në një deklaratë për mediet, ku ka bërë të ditur vendimet e Këshillit për këtë muaj. Sejko nënvizoi se rritja e çmimit të naftës dhe energjisë po reflektohet shumë dhe po ndikon drejtpërsëdrejti te konsumi. Sipas tij, konsumi ka filluar të zbehet dhe kjo përbën rrezik për inflacionin.
“Rritja e inflacionit gjatë tremujorit të katërt pasqyron kryesisht efektin e rritjes së ndjeshme të çmimeve të ushqimeve, të naftës dhe të energjisë në tregjet botërore. Kjo goditje pritet ta mbajë inflacionin mbi objektivin tonë gjatë muajve në vijim. Rritja e çmimeve të naftës, të energjisë dhe të ushqimeve në tregun botëror, ka filluar të pasqyrohet – në mënyrë direkte dhe indirekte – në çmimet e artikujve të konsumit në vend. Këto goditje janë krijuar nga një zhbalancim i përkohshëm i kërkesës dhe ofertës”, tha ai. Në këtë kuadër BSH vendosi që të mbajë të pandryshuar normën bazë të interesit.
Discussion about this post