Bilanc tragjik/ Pesë të vrarë dhe dy të plagosur në më pak se 24 orë

Pesë të vrarë dhe dy të plagosur është bilanci i më pak se 24 orëve në vend.

Rreth orës 14:07 të ditës së djeshme (19 gusht), në afërsi të një marketi te rrethrrotullimi i Komunës së Parisit, punonjësi i policisë Erjon Goxhara plagosi me armë zjarri 45 vjeçarin Lorenc Kosta.

Ngjarja ndodhi për motive të dobëta, pasi autori dyshonte se Kosta kishte lidhje me bashkëshorten e tij.

Efektivi i policisë qëlloi 6 herë në drejtim të 45 vjeçarit dhe plumbat e kapën në këmbë e një në bark. Pasi e plagosi ai e filmoi dhe më pas u largua, dyshohet në drejtim të Dajtit

Drejtori i policisë së Tiranës, Tonin Vocaj, në një deklaratë për mediet i bëri thirrje që të dorëzohet. Policia ka ofruar si shpërblim 10.000 euro si dhe numrin e kontaktit celular 0694111546, duke siguruar anonimatin e plotë, për cilindo që jep informacione të sakta për vendodhejn e efektivit në kërkim.

Kryeqyteti do të tronditej sërish në mbrëmje pas një krimi të dyfishtë në familje.

Shtetasi amerikan Mattheë James Wertz vrau bashkëshorten e tij, Lilis Sartika Saragih duke e mbytur me litar Ai ka mbytur gjithashtu dy qentë dhe më pas veten.

Ngjarja ndodhi në rrugën Vangjel Noti në Laprakë.

Fillimisht u gjet trupi i pajetë i amerikanit, i cili ishte vetëvarur, ndërsa më vonë, duke kërkuar për prova të reja, janë gjetur trupat e pajetë të bashkëshortes së tij me origjinë nga Indonezia, por me pasaportë amerikane.

53-vjeçari amerikan, pasi e ka mbytur gruan, e ka mbuluar trupin e saj me rroba dhe sipër tyre ka vendosur 2 trupat e mbytur të dy qenve.

Paraprakisht dyshohet që ngjarja të ketë ketë ndodhur në kushte depresioni, por kjo është pistë paraprake dhe po hetohet nga policia.

Një vrasje tjetër e dyfishtë do të trondiste mbrëmjen e djeshme Velipojën.

Ersild Ishmi, 33 vjeç dhe Arsid Hoxha, 22 vjeç u vranë me armë zjarri. Autorë të dyshuar të ngjarjes janë vëllezërit Gëzim dhe Eduart Frroku.

Nga ngjarja ka mbetur dhe një person i plagosur, kamarieri Zyber Zagradi. JavaNews konfirmon se ai ka marrë një plumb në këmbë.

22 vjeçari Arsid Hoxha ka marrë dy plumba, një në gjoks dhe një në bark, ndërsa 33 vjeçari ka marrë tre plumba, dy në gjoks dhe një në bark.

Ndërkohë në orët e para të mëngjesit të së martës një 68-vjeçar është gjetur i vrarë në Mirditë.

F. R., 68 vjeç ishte vrarë në banesën e familjes në fshatin Lajthizë, njësia administrative Orosh, ku kalonte muajt e verës. Për këtë ngjarje, Policia nuk ka ende një pistë hetimi.