Dhjetëra qytetarë të Thumanës, Krujës dhe Fushë-Krujës, kanë dalë në protestë pasditen e sotme para Parlamentit, teksa paralelisht ka nisur edhe sesioni i ri parlamentar.
Kërkesa e banorëve është t’u ofrohet hyrje dalje në aksin Thumanë-Kashar, e cila është bllokuar që me hapjen e autostradës pak javë më parë.
Kujtojmë se këta banorë prej javësh kanë protestuar duke bllokuar autostradën Thumanë – Kashar.
Ata janë shprehur se këtë çështje do ta çojnë në SPAK dhe se po ashtu kanë nënshkruar edhe një kallëzim për ministren e Infrastrukturës dhe Energjisë, Belinda Balluku dhe Autoritetin Rrugor Shqiptar.
“Do ta çojmë në SPAK çështjen e mungesës së aksesit në autostradë. Të hënën në orën 16:45 do të protestojmë para parlamentit.
Të martën në orën 18:00 do të protestojmë në aksin Thumanë – Kashar. Do të kallëzojmë në SPAK, Belinda Ballukun dhe ARSH”, janë shprehur banorët pak ditë më parë gjatë protestës.
Kreu i Grupit Parlamentar të PD Gazment Bardhi nga foltorja e Kuvendit, ka komentuar protestën e banorëve. Ai u shpreh se kërkesa e tyre nuk po dëgjohet nga askush. Sipas tij banorët kërkojnë vetëm hyrje dalje në një rrugën kombëtare.
“Zëri i banorëve të Krujës nuk dëgjohet dhe kërkesa e tyre është shumë e thjeshtë. Ajo rruga që është bërë të duket sikur po ecën në det, pasi për shkak të cilësisë së keqe të duket sikur po valvitesh në det. Por, ata nuk po flasin për cilësinë e rrugës, ata kanë një kërkesë minimale, kërkojnë hyrje dhe dalje në rrugëm kombëtare dhe kjo është kërkesë minimale dhe kjo nuk kërkon fonde, por kërkon dashamirësi për të dëgjuar kërkesën e tyre. Ministre të kërkoj që të dalësh dhe ti dëgjosh dhe një përfaqësi e tyre ka ardhur edhe sot në Kuvend. Nuk është zgjidhje ministër i brendshëm që dërgon policë për të shtypur protestën e asaj zone që kanë një kërkesë për të hyrë në rrugë kombëtare dhe çojnë atje forca speciale, a thua se po shkoni që të luftoni krimin”, tha ai.
Discussion about this post