Kreu i grupit parlamentar socialist Niko Peleshi vendosi të mos shprehej për qëndrimin që do të mbajnë në seancën e radhës plenare deputetët socialistë, lidhur me vendimin e Gjykatës Kushtetuese për Olta Xhaçkën.
Duke iu përgjigjur interesit të gazetarëve pas përfundimi të një mbledhje të grupit parlamentar socialiste, Peleshi tha se “çështja nuk ishte rendin e ditës”.
Sipas tij, ky vendim gjykohet individualisht nga deputetët dhe nuk ka një direktivë për të mbajtur një qëndrim të caktuar.
“Ne nuk i diskutojmë vendimet e Gjykatës Kushtetuese në grupin parlamentar. Kjo çështje s’është diskutuar sot se ne se trajtojmë si një vendim politik. Vendimi i Gjykatës Kushtetuese është bërë i njohur për gjithë deputetët do lexohet personazhit nga çdo deputetit dhe jo si grup parlamentar”, tha Peleshi.
Megjithatë, ndryshe nga sa pretendon Peleshi, socialistët kanë votuar më herët në grup në mbrojtje të Xhaçkës, duke shkelur në mënyrë të paprecedentë një vendim të Gjykatës Kushtetuese.
Peleshi nuk zbuloi as votën e tij për çështjen.
“Nuk jam këtu për të folur për vendimmarrjet e mia politike”, tha ai.
Kreu i grupit parlamentar i PS foli edhe për nismën e re të socialistëve për t’iu drejtuar Komisionit të Venecias lidhur me rastin Xhaçka, lëvizje kjo që duket më shumë si një tjetër stërkëmbësh për të zvarritur vendimmarrjen finale për mandatin e deputetit të ish-ministres.
“Do i drejtohemi Venecias, por jo për këtë çështje. Kjo çështje është në rrugën e vet. Ne do i kërkojmë mendim Komisionit të Venecias, duke u nisur nga kjo çështje në parim, për çdo situatë tjetër të mundshme në të ardhmen se ku fillon e mbaron diskrecioni i lirë i një deputeti dhe detyrimi e zbatueshmëria e vendimeve të Gjykatës Kushtetuese”, tha Peleshi.
Socialistët zvarrisin çështjen “Xhaçka” dhe nuk zbatojnë vendimet e Kushtetueses
Që nga nisja e shqyrtimit të kësaj çështje në Kuvend, në qershor 2022, mazhoranca doli në mbrojtje të Xhaçkës, duke zvarritur procesin dhe duke rrëzuar kërkesën e opozitës në Kuvend në nëntor 2022, që kërkoi heqjen e mandatit të deputetit për ish-ministren pasi bashkëshorti i saj, Artan Gaçi u shpall “investitor strategjik” nga qeveria. Në këto kushte, opozita u ankua në Gjykatën Kushtetuese, që në janar 2023 vendosi të shfuqizojë vendimin e Kuvendit si antikushtetues dhe i kërkoi atij që të vendoste për dërgimin pranë kësaj gjykate të mocionit te 1/10 së deputetëve. Më shumë se 1 vit pas këtij vendimi, mazhoranca votoi sërish kundër. Kryeministri Edi Rama u shpreh publikisht se “gjykata kushtetuese nuk e ka as detyrë as të drejtë e as mundësi që ti thotë parlamentit sesi duhet të veprojë për një rast apo një tjetër”. Ndërsa kryetarja e Gjykatës Kushtetuese Holta Zaçaj është shprehur se “të vësh në pikëpyetje zbatimin e vendimit të Gjykatës Kushtetuese është e paimagjinueshme në një shtet ligjor”. Tanimë, mazhoranca socialiste kërkon të fusë në lojë një mekanizëm të ri në betejën juridike për të mbrojtur deputeten socialiste Olta Xhaçka.
Me vendimin e vitit 2023, Kushtetuesja vlerësoi se në çdo rast, kur paraqitet një mocion nga 1/10 e deputetëve apo Kryetari i Kuvendit, Kuvendi është i detyruar t’ia dërgojë çështjen Gjykatës Kushtetuese.
Pasi e zvarritën vendimmarrjen për më shumë se një vit, në prill, PS i bëri një interpretim të sajin vendimit të Kushtetueses, duke pretenduar se ky vendim nuk mund ta detyrojë deputetin si të votojë dhe me forcën e kartonit rrëzoi vendimin e gjykatës.
Opozita e ridërgoi çështjen në Kushtetuese duke kërkuar deklarimin e këtij vendimi si të papajtueshëm me Kushtetutën dhe dhënien një interpretimi përfundimtar të zgjidhjes së konfliktit të kompetencave ndërmjet Kuvendit dhe pakicës parlamentare të 1/10 e deputetëve.
Gjykata e mori në shqyrtim këtë padi dhe pritej që vendimi të shpallej së shpejti, vendim që mesa duket kjo lëvizje e Kuvendit kërkon ta bllokojë duke rihapur çështjen në një organizëm ndërkombëtar.
Gjatë seancës shqyrtuese më 21 qershor anëtarët e gjykatës ngritën shumë pyetje për përfaqësuesen ligjore të Kuvendit për të kuptuar se në ç’rrethana ishte marrë vendimi nga Kuvendi dhe nëse kishin të drejtë organet e këtij institucioni që të vlerësonin vendimet e kësaj gjykate.
Çështja e mandatit të Xhaçkës ka krijuar një precedent në marrëdhëniet mes Kuvendit dhe Gjykatës Kushtetuese, duke shmangur praktikën e mëparshme parlamentare, kur Kuvendi ka vendosur që të dërgojë për interpretim në gjykatë mandatet e deputetëve kur ndaj tyre ka pasur akuza apo indicie se kanë shkelur nenin 70 të Kushtetutës që ndalon deputetët të përfitojnë nga të mirat publike.
Në këtë rast, mazhoranca ka përdorur afate dhe procedura parlamentare për të zvarritur në kohë shqyrtimin e saj në organet parlamentare dhe me vendim politik ka mbrojtur deputeten e saj duke rrëzuar 2 herë kërkesën e opozitës për ta dërguar këtë çështje për interpretim në Kushtetuese.
Qëndrim që pritet të përsëritet edhe në seancën plenare që pritet të mbahet të Enjten e 12 Shtatorit.
Discussion about this post