Analisti Fatos Lubonja ka reaguar pas publikimit të pagave të mbi 600 mijë qytetarëve shqiptarë që punojnë në sektorin publik dhe privat, mes të cilëve edhe vetë ai.
Duke iu referuar listës e cila është shpërndarë masivisht në aplikacionet e komunikimit, u raportua se Lubonja rezultonte se në janar të vitit 2021 kishte një pagë prej 640 mijë lekë të reja, si i punësuar në televizionin Agon Channel.
Por, në reagimin e tij, analisti sqaron se paga e fundit që ka marrë nga Agon Channel është në vitin 2015.
“Mark Twaini thotë: “Të vërtetën thuaju vetëm atyre që e meritojnë.” Për hir të atyre shqiptarëve që ende e meritojnë të vërtetën, të atyre që besojnë se si gazetar kam qenë në shërbim të interesit publik, si dhe të afërme dhe miqve që pas këtij lajmi mund të më shohin si një njeri që ua paska mbajtur fshehur rrogën apo se nuk paskam treguar bujarinë që e diktonte paga në raste shpenzimesh të përbashkëta si dreka, darka apo dhurata; sqaroj se e vetmja pagë mujore prej 3500 euro (neto) që kam marrë për punën time me kohë të plotë në Agon Channel daton vitin 2015”, shkruan Lubonja.
Lubonja shprehet se nuk beson në drejtësinë shqiptare që sipas tij, po anon drejt krimit, ndërsa shton se koha do t’i tregojë të gjitha.
Discussion about this post