Një grup i strukturuar kriminal që trafikonte kokainë nga vendet e Amerikës Latine në drejtim të vendeve të Bashkimit Evropian, kryesisht Italisë është shkatërruar gjatë një operacioni të përbashkët ndërkombëtarë të ndërmarrë njëkohësisht në 4 shtete. Deri tani janë lëshuar 61 urdhër-arresti ndërsa janë arrestuar 21 persona. Mes të ndaluarve ka edhe shtetas shqiptarë të dyshuar, teksa autoriteteve u janë dashur 4 vite hetime.
Ky grup kriminal e ushtronte aktivitetin kriminal në Itali, Shqipëri, Poloni dhe Zvicër, ku dhe u shtri operacioni në bashkëpunim me Eurojust, Europol.
Nga hetimi ka rezultuar ekzistenca e një grupi të strukturuar kriminal, i cili ushtronte aktivitetin kriminal të trafikimit të lëndëve narkotike të llojit kokainë nga vendet e Amerikës Latine në drejtim të vendeve të Bashkimit Evropian, kryesisht Italisë.
Të dyshuarit pastronin fitimet e tyre të paligjshme nëpërmjet një rrjeti të panumërt kompanish, të drejtuara nga një organizatë italo-kineze, e krijuar për këtë qëllim, e cila furnizonte fatura false për rreth 375 milionë Euro, informoi sot SPAK.
SPAK përmes një njoftimi pasditen e sotme bëri publike bilancin e operacionit në Shqipëri: Bëhet fjalë për 21 kontrolle dhe arrestimin e 2 anëtarëve të dyshuar të grupit të strukturuar kriminal. Konkretisht Jurgen Kacurri dhe Arjanit Maloku.
Sot, më datë 25.09.2024, në Republikën e Shqipërisë, janë kryer 21 kontrolle banesash dhe ambjente të tjera. Janë arrestuar në flagrancë dy pjesëtarë të grupit kriminal, shtetasit Jurgen Kacurri dhe Arjanit Maloku . Gjithashtu janë sekuestruar në cilësinë e provës materiale 30 mijë Euro, 6 mijë Paud, 2 automjete, 1 armë, 4 ora të markës Rolex, 26 aparate celulare, dokumente, sende të tjera me vlerë, si dhe prova të tjera materiale” informoi sot SPAK.
Para cash dhe pasuritë
Publikohen pamjet e operacionit të ndërmarrë njëkohësisht në 4 shtete kundër një grupi kriminal që merrej me trafikun e kokainës nga Amerika Latine në vendet e BE-së, kryesisht Itali.
Nga video duken dy çanta dhe njw valixhe mbushur plot e përplot, deng me euro të cilat janë vendosur në pako me vakum dhe më pas janë futur në çanta.
Gjatë hetimeve u arrestuan në flagrancë 21 persona që i përkasin grupit dhe u sekuestruan rreth 2 milionë euro e gjysmë cash, 5 pistoleta me municionet e tyre, 8 makina dhe 360 kg drogë të cilat, nëse do të hidheshin në treg, mund të kishin dhënë rreth 30 milionë euro.
Ndaj personave nën hetim janë lëshuar urdhra për sekuestrim paraprak me qëllim konfiskimin e pasurive në vlerë totale mbi 60 milionë euro.
Operacioni në Itali
Përveç sasive të drogës janë sekuestruar edhe 60 mln euro pasuri, mes të cilave 2 mln euro cash. Gjithashtu sasi armësh dhe 360 kg kokainë, raporton “Il Giorno”.
Nga hetimet e deritanishme mësohet se aktiviteti kriminal dhe narkotrafiku bëhej nëpërmjet platformave të koduara në Sky ECC.
Grupi kriminal dorëzonte lekët tek një grup kinez, i cili më tej si operator tranzit bënte të mundur nxjerrjen jashtë vendit me mjete transporti.
Operacioni po kryhet nga Prokuroria e Brescia, në koordinim me Komandën e Guardia di Finanza dhe Shërbimit Qendror të Hetimit të Krimit të Organizuar (S.C.I.C.O.), ku marrin pjesë rreth 400 forca policore dhe karabinierë.
Gjithashtu po bashkëpunon edhe Europol, Drejtoria Qendrore të Shërbimeve Kundër Drogës, Shërbimit për Bashkëpunim Ndërkombëtar Policor, Zyra e Ekspertit të Sigurisë pranë Ambasadës Italiane në Tiranë, forca policore shqiptare, polake dhe zvicerane dhe me mbështetjen e Agjencisë së Bashkimit Evropian për Bashkëpunim Gjyqësor (Eurojust).
gijotina.com/
Discussion about this post