Mashtronin me agjencinë turistike, dy të arrestuar në Tiranë – Emrat

Dy persona janë arrestuar nga policia e Tiranës pasi akuzohen se kanë mashtruar disa qytetarë me një agjenci turistike. Në pranga u vunë Redi Hambari, 24 vjeç dhe Kleo Karriqi, 22 vjeç. Sipas hetimeve, dy të rinjtë kanë përfituasr rreth 15 000 euro duke mashtruar klientët e agjencisë.

Të arrestuarit akuzohen për veprat penale “Mashtrimi”, kryer në bashkëpunim, “Fshehja e të ardhurave” dhe “Mospagimi i taksave dhe tatimeve”.

“Këta shtetas dyshohet se kanë mashtruar klientë të agjencisë së udhëtimit ku ishin të punësuar, pasi iu kanë marrë atyre paratë për rezervimin e biletave për vajtje, ardhje dhe për akomodim në hotel, por kanë blerë vetëm biletën për vajtje në destinacion”, njofton policia.

Sipas të dhënave në Qendrën Kombëtare të Biznesit Redi Hambari dhe Kleo Karriqi rezultojnë përkatësisht administratori dhe pronari i “AVIA CENTER” SHPK.