I dërguari amerikan për Ballkanin Perëndimor Alexander Kasanof filloi të enjten një vizitë dyditëshe në Kosovë me një takim me presidenten Vjosa Osmani dhe kryeministrin Albin Kurti.
Në një komunikatë të presidencës së Kosovës thuhet se në takim është diskutuar për forcimin e aleancës me Shtetet e Bashkuara dhe rëndësinë e bashkëpunimit të ngushtë për t`i përmbushur synimet e përbashkëta strategjike.
Në komunikatë citohet presidentja Vjosa Osmani të ketë “shtruar nevojën e dialogut strategjik me Shtetet e Bashkuara” si dhe anëtarësimin e Kosovës në NATO, “që forcon sigurinë e vendit por edhe në stabilitetin e rajonit”.
Kjo është vizita e parë e Kasanof në rajon që nga emërimi i tij në këtë post. Në një postim në rrjetet sociale, ambasadori amerikan Jeff Hovenier tha se gjatë takimeve do të theksohet mbështetja amerikane për popullin e Kosovës, duke trajtuar shqetësimet e përbashkëta dhe duke kërkuar përparim në rrugën evropiane të Kosovës si një shtet sovran, i pavarur e shumetnik.
Kasanof i cili në fillim të javës ishte në Bosnje e Hercegovinë, në Kosovë arriti nga Serbia ku është takuar me udhëheqësit serbë. Në një intervistë për mediumin proqeveritar Kurir në Serbi, ai citohet të ketë thënë se një nga arsyet e vizitës në rajon është parandalimi i konflikteve të mundshme në rajon.
Sipas një përkthimi të Kuririt, Kasanof e ka vlerësuar si jashtëzakonisht të rëndësishme gjetjen e një mënyre për të ecur përpara në dialogun ndërmjet Kosovës dhe Serbisë, duke theksuar kërkesën amerikane që palët të zbatojnë marrëveshjen që u arrit vitin e kaluar në Bruksel dhe në Ohër, për normalizimin e marrëdhënieve ndërmjet tyre.VOA
Discussion about this post