A po jep kryebashkiaku Rexhe Byberi urdhra për tendera nga arresti i shtëpisë? Me sa duket kreu i Bashkisë Tropojë, i cili ndodhet nën masë sigurie nga SPAK, e ka kthyer shtëpinë në zyrë. Tenderat vazhdojnë, klientët e pushtetit trokasin.
Byberi, i cili që nga data 9 shtator 2024 është vënë në arrest shtëpie, i çon deri në fund porositë përmes vartësve që organizojnë komisionet për tenderët korruptivë.
Pra, me kryetarin në arrest, Bashkia Tropojë ka firmosur së fundmi tenderin me objekt ‘Rehabilitim i ujëmbledhësit Dege, NJA Fierzë’. Sipas të dhënave bëhet fjalë për pastrimin e baltës apo mbeturinave që mund të jenë grumbulluar në digë.
Pastrimi dhe riparimet e mundshme do të zgjasin 4 muaj dhe për këtë punë Byberi ka urdhëruar shpenzimin e rreth 60 milionë lekëve.
Tenderi është hapur që më 2 gusht 2024 dhe ka qëndruar i hapur për 2 javë, ku janë dorëzuar 5 oferta. Të gjitha ofertat më të lira u skualifikuan që në fazën e parë të tenderit dhe është vlerësuar për në fazën finale vetëm oferta e firmës KACDEDJA shpk, megjithëse më e shtrenjta.
Që këtu ka nisur shkelja e parë e ligjit, pasi oferta më e shtrenjtë është një risk i shtuar për fondin limit. Abuzimi ka vazhduar më tej. Me autorizimin e Byberit, nënkryetarja Zyra Islamaj ka firmosur kontratën me firmën e Skënder Kacdedajt si fitues. A i kishte parasysh rregullat e ligjit ‘Për Prokurimet Publike’ kur e hodhi atë firmë? Besojmë se ë këto raste vepron vetëm porosia e kryetarit.
Për shkak të skandaleve të Byberit, ky tender u mbaj larg syve të publikut deri më datë 11 tetor 2024, kur është publikuar kontratat përfundimtare. Tenderit i është vënë nga Open Data Albania “Flamuri i kuq”, që është shenja e riskut të korrupsionit.
Pse nuk zunë mend e vartësit e Byberit?!
Është gati e pashpjegueshme se si vijojnë të bëjnë tenderë pa garë në këtë bashki, kur një muaj më parë kryebashkiaku është marrë i pandehur për shpërdorim detyre. Kujtojmë se, kryebashkiaku socialist i Bashkisë së Tropojës, Rexh Byberi është marrë në hetim nga SPAK dhe ndaj tij Gjykata e Posaçme ka vendosur masën arrest shtëpie. Byberi bashkë me zv.kryetarin e Bashkisë, Abedin Kërrnaja akuzohen për shpërdorim detyre në dy raste. GJKKO ka caktuar masën arrest në shtëpi edhe për zv.kryetarin Kërrnaja, për të njëjtën akuzë.
Në bashkëpunim me njëri-tjetrin, Prokuroria e Posaçme thotë se Byberi dhe Kërrnaja kanë shkelur ligjin në për ndërtimin e dy rrugëve, duke i shkaktuar buxhetit të shtetit 277. 611.520 lekë.
Dy hetimet e nisura nga organet vendore të qarkut Kukës përkatësisht në vitin 2021 dhe 2023 i kanë kaluar për kompetencë SPAK.
Sipas SPAK, kryetari i Bashkisë dhe nënkryetari kanë shkelur ligjin “Për miratimin e rregullores së zhvillimit të territorit”, gjatë procesit për hapjen e dy rrugëve sipas projekteve të miratuara nga Këshilli Bashkiak. Bëhet fjalë për vendimin e marrë nga Këshilli Bashkiak për ndërtimin e rrugës Stacioni i Anijes Palç- Guri i Lules”, me një gjatësi 3.2 km, totalisht ndërtim i ri, i cili 80% të kësaj gjatësie kalon nëpër rrugën këmbësore ekzistuese. Ndërkohë dhe vendimin e marrë për miratimin në parim të projekt idesë së rrugës “Qafë Murrizi- Qafë Agri”.
Prokuroria e Posaçme thotë se “këto punime janë bërë në kundërshtim me aktet ligjore, pasi për kryerjen e punimeve për hapjen e një rrugë të re, duhej të bëhej aplikimi në sistemin elektronik e-leje, pranë Bashkisë Tropojë, si institucion vendor që ka tagrin të shqyrtojë dhe miratojë lejen e ndërtimit të infrastrukturës, pasi të ketë verifikuar plotësimin e dokumentacionit të nevojshëm tekniko-ligjor nga aplikuesi që parashikon legjislacioni për këto lloj punimesh.”
Ndërkohë në 8 prill 2024, tre vartës të Byberit pranuan fajësinë për korrupsionin me një tender, për të cilin i akuzoi prokuroria.
Prokuroria e Posaçme kundër Korrupsionit dhe Krimit të Organizuar Tiranë, SPAK njoftoi më 8 prill përfundimin e hetimeve ndaj tre zyrtarëve të Bashkisë së Tropojës, të akuzuar për “shkelje të barazisë së pjesëmarrësve në tendera…” dhe paraqitjen në gjykatë të marrëveshjes për pranimin e fajësisë nga ana e të pandehurve.
Hetimi ndaj tre zyrtarët e Bashkisë Tropojë, Zenel Çela, Ramiz Bardhi dhe Rexhep Ismajlisufaj ka filluar në vitin 2021, bazuaer në një material kallëzues të KLSH-së, lidhur me procedurën e ndjekur në prokurimin publik me objekt “Shkolla Asim Vokshi-Palestër dhe terrene sportive dhe sistemime të jashtme në gjimnazin Asim Vokshi”, me fond limit 50.3 milionë lekë, pa TVSH.
Sipas prokurorisë, nga analiza e provave dhe të dhënave të grumbulluara rezulton e provuar se të pandehurit me veprimet e tyre si anëtarë të Komisionit të Vlerësimit të Ofertave, nuk kanë trajtuar në mënyrë të barabartë operatorët ekonomikë pjesëmarrës në këtë tender.
“Megjithëse Bashkimi i Operatorëve Ekonomikë Halili 1 & Shendelli, ka paraqitur ofertën më të ulët në vlerën 42.072.833 lekë, pa Tvsh, të pandehurit në cilësinë e anëtarëve të Komisionit të Vlerësimit të Ofertave, në kundërshtim me Ligjin dhe Rregullat e prokurimit publik, si dhe me kriterin e vendosur në Dokumentet Standarde të Tenderit, kanë shpallur fitues operatorin ekonomik 4 A-M, me ofertën 50.269.533 lekë pa TVSH, duke shkaktuar një dëm ekonomik në vlerën 8.196.700 lekë (si diferencë midis dy ofertave)”, citohet në njoftimin e prokurorisë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
Discussion about this post