Bumçi: Çfarë bënte policia në Kuvend, kur e ndalon ligji?

Në seancën plenare të kësaj të enjteje, situata u tensionua me akuza dhe kundërakuza mes deputetëve nga dy kampet, PS dhe PD.

Deputetët e Partisë Demokratike akuzuan efektivët e policisë se kishin tentuar të përdorin armën në drejtim të tyre, duke shpërndarë pamje filmike për të mbështetur pretendimin e tyre.

Ndërkohë, policia e përgënjeshtroi këtë akuzë me një video tjetër, duke sqaruar se asnjë efektiv nuk mbante armë gjatë protestës dhe se ajo që PD e quan armë ishte thjesht një bombul e vogël me spraj.

Anëtari i Kryesisë së Partisë Demokratike, Aldo Bumçi, ishte i ftuar në Euronews Albania për të diskutuar rreth akuzave të Partisë Demokratike ndaj një prej efektivëve të policisë. Sipas Bumçit, pavarësisht nëse ishte armë apo spraj, ligji nuk lejon praninë e forcave të policisë brenda ambienteve të Kuvendit.

“Ky vend nuk ka më asnjë institucion, përveç Edi Ramës, një sulltan që kontrollon gjithçka. Parlamenti është institucioni më i rëndësishëm dhe Edi Rama e ka shkatërruar. Ajo që ka ndodhur sot është degradim që duhet të marrë një përgjigje të fortë nga opozita dhe qytetarët. Kjo është shkatërrim që nuk njeh vullnetin e 730 mijë njerëzve. Këta qytetarë kanë si dëshmitarë deputetët dhe Rama nuk po i njeh këta deputetë. Nuk kishte nevojë të pyesnim nëse kishte armë apo jo. Dhe po, kishte armë sepse ishin shumë deputetë atje. Pyetja e parë është: çfarë bënte FNSH-ja atje, kur është e ndaluar me ligj? Çfarë bënte policia atje? Kush e thirri? Nëse një polic ka qenë i çmendur, pse ishin të gjitha Forcat Speciale atje? Janë përgjegjës tre persona: kryetarja Spiropali, pa lejen e të cilës nuk futet askush në atë Parlament, ministri i Brendshëm dhe Edi Rama. Nuk ka rëndësi nëse ishte armë apo spraj; ai nuk duhej të ishte fare atje për të goditur deputetin,” tha Bumçi.