Gruaja tenton të vetëdigjet para Bashkisë së Durrësit: Kam probleme ekonomike

në Aktualitet

Kohë leximi: 3 min

Një grua e moshuar raportohet se ka tentuar të vetëdigjet me benzinë paraditen e kësaj të marte, para bashkisë së Durrësit.

Portali lokal “DurrësLajm” shkruan se kalimtarët e rastit dhe policët bashkiakë që ndodheshin në sheshin “Liria” kanë ndërhyrë menjëherë dhe e kanë ndihmuar të moshuarën të largojë rrobat e djegura nga trupi, duke pësuar djegie vetëm në këmbë.

“Gruaja e moshuar, e cila ishte ende e tronditur dhe me zërin që i dridhej, nuk arriti dot të shpjegonte qartësisht arsyet që e shtynë drejt këtij akti ekstrem, por tha se gjithçka e bëri prej problemeve ekonomike dhe se fëmijët e kishin braktisur. Ajo u transportua me autoambulancë drejt spitalit të Durrësit, ku do të mbahet nën kujdesin e mjekëve”, thuhet më tej në raportim.

Lidhur me këtë ngjarje ka reaguar edhe Sekretarja për Marrëdhënien me Publikun në Partinë Demokratike, Jola Hysaj nëpërmjet rrjeteve sociale.

“Akti i ndodhur mëngjesin e kësaj të marte në qytetin e Durrësit është ulëritës, shokues, tronditëse. Ku skamja është aq e tmerrshme sa zonja tentoi të vetë digjej si zgjidhje e 1000 problemeve të saj. ‘Kafshatë që s’kapërdihet asht, or vlla, mjerimi’. Këto janë vargjet e Migjeni që për fatkeqësinë e Shqipërisë sot vazhdon të mbetet më aktual se kurrë. Edhe sa do durojë ky popull? Sa darka tek “Nusreti” do haj ende me grykësin dhe pangopjen kjo qeveri, ky shtet ,në mund të quhemi një i tillë? A nuk duhet të jetë qeveri dhe qeveritarët shërbyes të popullit? Apo këta duhet të jenë gërryesit e ekzistencës se ç’do qenie ekzistente në këtë Shqipëri plot halle e trauma, ku shumë fshihen si struci e të tjerë heshtin prej kafshatës së bukës”, shprehet Hysaj.

Lidhur me rastin, Policia reagoi më shumë se tre orë pas publikimit në media, duke njoftuar shkurtimisht se “ditën e sotme, në lagjen nr. 2, shtetasja F. G., 58 vjeçe, banuese në Durrës, ka tentuar të vetëdigjet me benzinë, në rrugë. Aktualisht ndodhet në spital, në kujdesin e mjekëve. Grupi hetimor po punon për sqarimin e rrethanave të rastit”.