Sa herë që ka zgjedhje Veliaj kthehet në Yzberisht dhe Kashar ku bën ndonjë foto me rul dhe asfalt në sfond, ndërkohë që mbulon shpërdorimin e miliona eurove në tendera korruptivë. Fotoja më poshtë është shkrepur në vitin 2020 dhe Veliaj premtoi të rregullonte infrastrukturën e lagjes së quajtur “Astir”. Rruga quhet Tom Plezha.
“Me të njëjtin investim po bëjmë edhe linjën e transmetimit të Ujësjellësit, që nga e gjithë zona e Astirit deri në Yzberisht të kemi një linjë të furnizimit me ujë, për të kaluar edhe këtu në 24 orë ujë. Por, që të mos i hyjmë punëve nga dy-tre herë – pra një herë Ujësjellësi, pastaj OSHEE-ja, interneti, telefoni, pastaj asfalti apo ujërat e bardha – aksi po bëhet njëherë e mirë. Kështu shpëtojmë nga zig-zaget e rrugës ‘Tom Plezha’”, deklaroi Veliaj.
Sot e kësaj dite ajo zonë është model i kaosit. Por erdhën zgjedhje dhe Lali Erit prapë do të vijë aty për foto. Këtë radhë do të hedhë 2 milionë euro dhe do të asfaltojë disa rrugica që janë pak më larg. Dhe çdo projekt është një fasadë për tenderin abuziv
Flasim për prokurimin me objekt ‘Rehabilitimi i Infrastrukturës Rrugore në Njësinë Administrative nr. 6 + 14 + Kashar’. Kur shohim këtë titull menjëherë të shkon mendja që do bëhet ndërhyrje në lagjen e Astirit, Kombinatit, Yzberishtit dhe Kasharit, që përmblidhen nga këto njësi, por në fakt do të rehabilitohen vetëm katër rrugica në periferi të këtyre zonave.
Edhe me foto edhe me përshkrim tregohet se bëhet fjalë vetëm për 4 rrugica, në lagjet periferike, të cilave do t’u pastrohen anësoret, do t’u hidhet nga një shtresë asfalt dhe do të rregullohen kanalizimet.
Konkretisht, do të ndërhyhet në rrugën Rr “Arkitekt Sinani” ndodhet në Njësinë Administrative Kashar, ka gjatësi rreth 790 metra dhe gjerësi 5-6 metra kufizohet me rrugën nacionale “Tiranë-Durrës”.
Gjithashtu, ka nevojë për një shtresë asfalt rruga “Mustafa Krantja” ndodhet në Njësine Administrative nr. 6, rruga ka një gjatësi rreth 450 metra dhe gjerësi variabël 5-7 m.
Sipas të dhënave do të rehabilitohet edhe rruga “Gjergj Elez Alia” dhe “Lazer Filipi”, ndodhen në Lagjen 14, që përfshin Yzberisht, Kashar . Të dy rrugët kanë nevojë për rehabilitim total dhe kanë një gjatësi rreth 550 metra.
Pra në total do të shtrohen rreth 1.8 km rrugë, në këto zona, që prej vitesh janë lënë në harresë. Për këto Veliaj sigurisht që duhet të japë shpjegim kur të bëhet auditimi nga KLSH, sepse është i pajustifikueshëm ky fond i madh sikur po ndërtohen 2 kilometra autostradë dhe jo 4 rrugica të ngushta.
Tenderi me “Flamur të kuq”
Mënyra e zhvillimit të tenderit e bën të qartë përse Veliaj vepron me fonde të fryra. Shohim që Open Data Albania i ka vendosur tenderit ‘Flamurin e kuq’ që është shenja e riskut të korrupsionit.
Fillimisht janë regjistruar 18 konkurrentë, nga të cilat 17 oferta janë skualifikuar që në fazën e parë, për të lënë vetëm kompaninë fituese. Për më tepër, vetëm për 10 prej tyre janë dhënë arsyetimet për skualifikimin nga gara, pjesa tjetër është larguar se kështu ka vendosur kryetari.
Në këtë mënyrë për në fazën e fundit mbeti vetëm oferta e bashkimit të operatorëve “GLAVENICA” – “LACAJ” shpk, me pronar përkatës Lavdimir Baraj, Majlinda Baraj dhe Bashkim Laçaj. Pa konkurrentë përballë, ata përfituan kontratën në formë shpërblimi. Gara është mbajtur që në fund të gushtit, por kontrata është bërë publike më datë 18 tetor 2024. Tani pazari u mbyll, le të shpresojmë që në fund, para zgjedhjeve, banorët të shohin ndonjë rul që shtron rrugën dhe kryetarin që bën foto.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
Discussion about this post