Kurti: Nga janari do rriten pagat, mësuesit dhe policët rritje deri 20 përqind

Kryeministri Albin Kurti paralajmëroi rritje të pagave për te gjithë punonjësit e sektorit publik nga janari i vitit të ardhshëm.

Sipas Kurtit, të gjithë të punësuarit për sektorët publikë pagat do të rriten nga 55 euro e nga korriku edhe për 55 euro të tjera.

Ministri i Financave, Hekuran Murati shtoi se ka rritje prej 17.85% për mësuesit dhe ushtarët e deri në 20% për policët, zjarrfikësit dhe infermierët.

Sipas tabelës që prezantoi ai, mësuesit aktualisht kanë 616 euro pagë bazë, ndërkaq me rritje do të marrin 726 euro.

Policët nga 550 euro do të marrin 660 euro, infermierët nga 605 do të marrin 715 euro, zjarrfikësit nga 550 euro do të marrin 660 euro dhe ushtarët nga 616 euro do të marrin 726 euro.

Kryeministri Kurti ka kërkuar mbështetjen e opozitës për kalimin e buxhetit për vitin e ardhshëm në Kuvend në një kohë kur Lëvizjes Vetëvendosje i janë larguar disa deputetë dhe varet nga grupi multietnik për kuorum.