Deputetja demokrate, Ina Zhupa në një deklaratë për mediat përpara Gjykatës Kushtetuese ka bërë me dije se ka dorëzuar një padi të firmosur nga 37 deputetë të PD kundër ligjit për “zonat e mbrojtura” të miratuar nga qeveria.
Zhupa është shprehur se ky ligj zhduk zonat e mbrojtura, dhe cilido që është pranë Ramës, mund të ndërtojë në zonat e mbrojtura komplekse pa fund.
“Ligji nuk mbron interesin publik dhe qyterarëve, por mbron interesin e Ramës për të bërë para për zgjedhjet e ardhshme. Si mund të mbrohet interesi publik kur një zonë e mbrojtur do të vihet në shërbim të oligarkëve të Ramës. Ashtu si merret leja në mes të Tiranës, ashtu do të merret leje dhe në zonat e mbrojtura. Si mund të jetë në interes publik ku, në vend të një liqeni dhe lagune për të gjithë njerëzit, do të jenë pishinat. Ky ligj bie në kundërshtim me parimet e informimit publik dhe pjesëmarrjen e qytetarëve pasi është bërë pa pyetur dhe konsultuar me publikun. Ne kemi bërë një padi në GJK me të gjitha nenet që shkelen me këtë ligj të ri. Ne jemi këtu për të garantuar interesin publik dhe të përfaqësojmë qytetarët, sot praktikisht në Shqipëri nuk ka zona të mbrojtura”, u shpreh ajo.
ligji për Zonat e Mbrojtura u miratua me 74 vota pro në Kuvendin e Shqipërisë më 22 shkurt të këtij viti. Ky ligj është kundërshtuar nga opozita e cila kërkon me ngulm rrëzimin e tij.
Discussion about this post