Opozita zhvilloi sot protestën e 33-të përpara bashkisë së Tiranës. Protestuesit bënë thirrje për dorëheqje të kryebashkiakut Erion Veliaj dhe arrestimin e tij, duke e akuzuar atë se është i përfshirë në korrupsion.
Sekretari i Përgjithshëm i Partisë së Lirisë, Tedi Blushi hodhi akuza dhe në drejtim të SPAK, duke e konsideruar një institucion partiak, që vepron me urdhër nga qeverisja. “Dumani ka një mision, që të burgosë liderin e Partisë së Lirisë, Ilir Meta, pa prova, pa fakte, pa dëshmi, sepse ai ka mision të burgosi Liderin e Partisë Demokratike, Prof. Dr. Sali Berishën, pa fakte, pa prova, pa dëshmi, sepse qëllimi i tij është të asgjësojë opozitën”, tha Blushi.
Shefi i Organizimit në PD, Klevis Balliu tha se “luftojmë për të mbrojtur vlerat dhe parimet që na karakterizojnë si popull. Dhe Erion Veliaj dhe Edi Rama janë kërcënuesit kryesorë të atyre parimeve. Ne qoftë se duam të dimë se çfarë është të jesh proamerikan është të luftosh dhe të votosh për parimet demokratike, njësoj siç bënë në Amerikë të bëjmë edhe ne këtu”.
Dorian Teliti nga PD akuzoi për korrupsion galopant treshen Rama-Veliaj-Balluku dhe u shpreh se “kjo gjë duhet të shkojë drejt fundit, duhet të veprojmë me çdo mjet, mosbindja civile duhet të udhëheqë çdo protestë, sepse ndonëse ne flasim (me të drejtën e zotit e me fakte), ata që janë ende në krye të punës Rama-Veliaj-Balluku vazhdojnë të bëjnë kërdinë”.
Këshilltarja e djathtë Ilda Zhulali theksoi se “era me rëndë e Tiranës sot është era e korrupsionit dhe vjedhjes”. “Ne do të qëndrojmë këtu deri sa ta pastrojmë Tiranën dhe ta pastrojmë Shqipërinë nga era e korrupsionit vjedhjes dhe Krimit”, tha ajo.
Në përfundim të tubimit që zgjati gati 40 minuta, protestuesit qëlluan godinën e bashkisë së Tiranës me sapun. “Ky institucion është plot me pisllëk. Prandaj kemi sjellë disa sapunë që ti marrë Erion Veliaj dhe të lahet me to. Le ti marrë se do ti duhen edhe për tek burgu 313 ku do të shkojë. Nëse ndonjë polic është palë me të, le ti marrë dhe të ja çojë edhe Ilir Prodës, sepse edhe ai shumë shpejt do të shkojë tek 313-a”, tha Adriana Kalaja, nga Aleanca për Teatrin, ndërsa u njoftua se protestat përpara bashkisë do të vijojnë.
Prej disa kohësh, opozita proteston përpara bashkisë së Tiranës kundër korrupsionit si dhe kërkojnë dorëheqjen dhe arrestimin e kryebashkiakut Erion Veliaj. Ky i fundit cilësohet nga opozita si koka e bandës së drejtorëve hajdutë të arrestuar për aferën njohur si “5D” si dhe pronari faktik i inceneratorit të Tiranës.
Gjithsesi, pavarësisht indiceve dhe provave për të dyja çështjet, SPAK nuk ka ngritur asnjë akuzë ndaj Veliajt.
Discussion about this post