Champions, Asllani pritet të luajë sërish si titullar në përballjen ndaj Leipzig

Mesfushori i Kombëtares shqiptare të futbollit, Kristjan Asllani, me shumë mundësi do të luajë titullar këtë të martë në ndeshjen e Champions League, të Inter-it kundër RB Leipzig.

Sajti i specializuar i statistikave, “sofascore”, ka publikuar formacionin e mundshëm të këtij takimi, teksa shihet se shqiptari është pjesë e 11-shes që pritet të luajnë nga minuta e parë.

Hakan Calhanoglu duket se nuk është ende në gjendje për të zbritur në fushën e lojës dhe në një situatë të tillë, duke i shtuar edhe faktin që në ndeshjen Verona-Inter, Asllani bëri shumë mirë, trajneri Simone Inzaghi mund t’i besojë sërish rolin e titullarit 22-vjeçarit shqiptar.

Inter-RB Leipzig përballen këtë të martë, duke nisur nga ora 21:00, sfidë e raundit të 5-të të fazës së Ligës në Champions League.